ក្រុមហ៊ុនជាម្ចាស់ស្ថានីយកើតឃាតកម្ម ត្រូវបានសាកសួរ
ភ្នំពេញៈ ក្រុមហ៊ុនដែលជាម្ចាស់ស្ថានីយប្រេង កាល់តិច បូកគោ រាជធានីភ្នំពេញជាកន្លែងដែលអ្នកស្រាវជ្រាវ និងវិភាគសង្គមលោកបណ្ឌិត កែម ឡី ត្រូវបានគេបាញ់សម្លាប់កាលពីខែកក្កដា កន្លងទៅត្រូវបានសាកសួរ ដើម្បីឲ្យបញ្ចេញវីដេអូថតបានពីកាមេរ៉ាសុវត្ថិភាព និងព័ត៌មានពីបុគ្គលិកមួយចំនួន។ នេះបើយោងតាមឯកសារមួយដែលបានដាក់ទៅតុលាការរដ្ឋ កាលីហ្វ័រនីញ៉ា សហរដ្ឋអាមេរិក។មេដឹកនាំគណបក្សប្រឆាំងលោក សមរង្ស៊ី រួមជាមួយពលរដ្ឋកម្ពុជាមួយក្រុមទៀតបានចោទប្រកាន់ថា ករណីនេះ ជាឧក្រិដ្ឋកម្មប្រឆាំងមនុស្សជាតិដែលបានប្រព្រឹត្តឡើងដោយមន្ត្រីរដ្ឋាភិបាលកម្ពុជា ហើយបានស្នើទៅក្រុមហ៊ុន Chevron ជាម្ចាស់ស្ថានីយប្រេងកាល់តិច (Caltex) ឲ្យបញ្ចេញវីដេអូទាំងអស់ដែលថតបានពីកាមេរ៉ាសុវត្ថិភាពមានទីតាំងស្ថិតនៅផ្លូវម៉ៅសេទុង រវាងពីថ្ងៃទី ១ និងថ្ងៃ ១៤ ខែកក្កដា ឆ្នាំ ២០១៦ នេះ។ប្រភព៖ភ្នំពេញប៉ុស្ដិ៍
