មន្ត្រីបក្សប្រឆាំងនៅខេត្តព្រះសីហនុប្ដឹងតវ៉ាថាមានឈ្មោះជនបរទេសក្នុងបញ្ជីបោះឆ្នោត
មន្ត្រីជាន់ខ្ពស់គណបក្សសង្គ្រោះជាតិ ខេត្តព្រះសីហនុ ចោទមន្ត្រីរៀបចំការបោះឆ្នោតនៅសង្កាត់លេខ១ ថាមិនទទួលយកពាក្យបណ្ដឹងរបស់ខ្លួនទាក់ទងករណីជនជាតិវៀតណាម មានឈ្មោះក្នុងបញ្ជីឈ្មោះបោះឆ្នោត ដែលគណៈកម្មាធិការជាតិរៀបចំការបោះឆ្នោត (គ.ជ.ប) បិទផ្សាយបញ្ជីបឋមកាលពីថ្ងៃទី៣ ខែមករា។មន្ត្រីសង្គមស៊ីវិល បានស្នើឲ្យមន្ត្រីរៀបចំការបោះឆ្នោតប្រចាំខេត្តព្រះសីហនុ ត្រូវអនុវត្តការងារបោះឆ្នោតនេះឲ្យស្របតាមច្បាប់បោះឆ្នោត ឬ គ.ជ.ប បានកំណត់។ប្រធានគណៈកម្មាធិការប្រតិបត្តិគណបក្សសង្គ្រោះជាតិ ប្រចាំខេត្តព្រះសីហនុ លោក សុខ សាវ៉ាត មានប្រសាសន៍ថា មន្ត្រីទទួលបន្ទុករៀបចំការងារបោះឆ្នោតនៅសង្កាត់លេខ១ បានបដិសេធមិនទទួលយកពាក្យបណ្ដឹងរបស់ក្រុមការងារគណបក្សខ្លួន កាលពីព្រឹកថ្ងៃទី៤ ខែមករា។ លោកឲ្យដឹងថា ពាក្យប្ដឹងរបស់គណបក្សសង្គ្រោះជាតិ បានប្ដឹងតវ៉ាទៅមន្ត្រីរៀបចំបញ្ជីឈ្មោះបោះឆ្នោតនៅសង្កាត់លេខ១ ដែលបក្សខ្លួនបានរកឃើញជនបរទេសមួយចំនួនមានឈ្មោះក្នុងបញ្ជីបោះឆ្នោត ដែល គ.ជ.ប បានបិទផ្សាយបញ្ជីបោះឆ្នោតបឋមកាលពីថ្ងៃទី៣ ខែមករា។ប្រភព៖RFA
