អង្គរក្សម្នាក់ទៀត ដែលវាយតំណាងរាស្រ្ត ត្រូវបានដំឡើងជា ឧត្តមសេនីយ៍
ភ្នំពេញៈ ក្រោយពេលចេញពីពន្ធនាគារកាលពីថ្មីៗនេះ ទាហានម្នាក់ទៀតក្នុងចំណោម ៣ នាក់នៃកងអង្គរក្សរបស់លោកនាយករដ្ឋមន្រ្តី ហ៊ុន សែន ដែលត្រូវបានកាត់ទោសពាក់ព័ន្ធនឹងករណីវាយប្រហារលើតំណាងរាស្រ្តពីររូបរបស់គណបក្សប្រឆាំងក៏ត្រូវបានដំឡើងឋានៈផងដែរ បន្ទាប់ពី ២ នាក់មុនត្រូវបានដំឡើងឋានន្តរស័ក្ដិរួចម្ដងហើយ បើទោះជាអ្នករងគ្រោះផ្ទាល់បានរិះគន់ថាខុសច្បាប់ និងថាជាវប្បធម៌លើកទឹកចិត្តដល់អ្នកប្រព្រឹត្តល្មើសក្ដី។ នេះបើតាមព្រះរាជក្រឹត្យដែលចេញដោយព្រះមហាក្សត្រ។លោក ឆាយ សារិទ្ធ ដែលបានសារភាពថាបានវាយប្រហារទៅលើតំណាងរាស្រ្តគណបក្សសង្គ្រោះជាតិពីររូបគឺលោក ញ៉យ ចំរើន និងលោក គង់ សភា នៅមុខរដ្ឋសភាកាលពីខែតុលាឆ្នាំ ២០១៥ ត្រូវបានដំឡើងឋានៈពីវរសេនីយ៍ឯកទៅជាឧត្តមសេនីយ៍ត្រីតាមព្រះរាជក្រឹត្យមួយដែលចុះហត្ថលេខាដោយព្រះរាជតំណាងលោក សយ សុខា អគ្គលេខាធិការរដ្ឋាភិបាលចុះថ្ងៃទី ២២ វិច្ឆិកា ២០១៦។ នេះបើតាមឯកសារដែលទទួលបាន។ប្រភព៖ភ្នំពេញប៉ុស្ដិ៍
