មេឃុំមកពីគណបក្ស សម រង្ស៊ី នៅស្ទឹងត្រែងប្រតិកម្មនឹងការកាត់ប្រាក់ខែ
- - - - - - - - - - - - - - - - -
ក្រសួងមហាផ្ទៃ សម្រេចកាត់ប្រាក់បៀវត្សរ៍សមាជិកក្រុមប្រឹក្សាឃុំ-សង្កាត់ ១៩រូបមកពីគណបក្ស សម រង្ស៊ី នៅខែត្រស្ទឹងត្រែង អំឡុងខែមីនា។ ការសម្រេចនេះដោយសារសមាជិកក្រុមប្រឹក្សាឃុំ-សង្កាត់ទាំងនោះបានទៅឈរឈ្មោះបោះឆ្នោតឲ្យគណបក្សសង្គ្រោះជាតិ វិញ។ ចំណែកមន្ត្រីសង្គមស៊ីវិលចាត់ទុកការសម្រេចរបស់ក្រសួងមហាផ្ទៃ ថាអាចប៉ះពាល់ដល់ដំណើរការអភិវឌ្ឍន៍មូលដ្ឋាន។មេឃុំស្រែគរ ស្រុកសេសាន ខែត្រស្ទឹងត្រែង ដែលឈ្នះឆ្នោតដឹកនាំរដ្ឋបាលឃុំស្រែគរ មកពីគណបក្ស សម រង្ស៊ី ហាក់មិនអស់ចិត្តលើសេចក្ដីសម្រេចរបស់ក្រសួងមហាផ្ទៃ ដែលបានកាត់ប្រាក់ខែសមាជិកក្រុមប្រឹក្សាឃុំស្រែគរ ចំនួន ៣រូប និងរំលាយតួនាទីសមាជិកក្រុមប្រឹក្សាឃុំមកពីគណបក្ស សម រង្ស៊ី ដែលពុំទាន់ចប់អាណត្តិការងាររយៈពេល ៥ឆ្នាំ។មេឃុំស្រែគរ លោក សៀក មេគង្គ ចាត់ទុកការរំលាយសមាជិកភាពរបស់លោកចេញពីប្រធានក្រុមប្រឹក្សាឃុំស្រែគរ ជារឿងនយោបាយ ដែលអាចប៉ះពាល់ការផ្ដល់សេវាសាធារណៈជូនពលរដ្ឋ និងការអភិវឌ្ឍមូលដ្ឋាន។
- - - - - - - - - - - - - - - - -
ប្រភព៖RFA
http://www.rfa.org/khmer/news/politics/stungtreng-03222017042356.html
