លោក ពេជ្រ ស្រស់៖គោលនយោបាយអហិង្សា ដើម្បីរក្សាសុវត្ថិភាពបេក្ខជន
- - - - - - - - - - - - - - - - -
លោក ពេជ្រ ស្រស់ ប្រធានគណបក្សយុវជនកម្ពុជា បានឲ្យដឹងថា គណបក្សបានដាក់ចេញ នូវគោលនយោបាយអហិង្សា ដើម្បីរក្សានូវសុវត្ថិភាពរបស់បេក្ខជន និងប្រជាពលរដ្ឋក្នុងមូលដ្ឋាន ព្រមទាំងទប់ស្កាត់ជម្លោះនយោបាយ ក្នុងពេលឃោសនាបោះឆ្នោតឃុំ-សង្កាត់ អាណត្តិទី៤ពេលខាងមុខ។ យោងតាមបណ្ដាញ សង្គមហ្វេសប៊ុករបស់ លោក ពេជ្រ ស្រស់ នៅព្រឹកថ្ងៃទី២៩ មីនា នេះ បានបើកកិច្ចប្រជុំជាមួយ បេក្ខជនក្រុមប្រឹក្សាឃុំ-សង្កាត់ របស់គណបក្សយុវជនកម្ពុជាទាំង ១៩ ឃុំ ក្នុងខេត្តត្បូងឃ្មុំ។ លោក ពេជ្រ ស្រស់ បានឲ្យដឹងទៀតថា គោលការណ៍នយោបាយអហិង្សាឃុំ-សង្កាត់ បានដាក់ចេញឲ្យបេក្ខជនឃុំ-សង្កាត់ របស់គណបក្សយុវជនកម្ពុជាអនុវត្ត គឺមានបីចំណុច៖ទី១ គឺមិនប្រើសារនយោបាយ មានលក្ខណៈមូលបង្កាច់អ្នកដទៃ ,ទី២ គឺប្រកាន់នូវសីលធម៌ត្រជាក់គ្រប់កាលៈទេសៈ ,និង ទី៣ គឺមិនឃោសនាបែបជ្រុលនិយម។
- - - - - - - - - - - - - - - - -
ប្រភព៖ដើមអម្ពិល
