លោក សុខ ឥសាន ៖ CNRP នឹងត្រូវជួបហានិភ័យ យ៉ាងធ្ងន់ធ្ងរ
- - - - - - - - - - - - - - - -
ភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) បានលើកឡើងថា គណបក្សសង្រ្គាះជាតិ (CNRP) នឹងត្រូវជួបហានិភ័យយ៉ាងធ្ងន់ធ្ងរ នៅអាណត្តិខាងមុខ។ លោក សុខ ឥសាន បានថ្លែងតាមរយៈតេឡេក្រាម នៅថ្ងៃទី៣ ខែឧសភា ឆ្នាំ២០១៧ថា គណបក្សប្រជាជនកម្ពុជា មានសមាជិកជាង ៥ លាននាក់ ហើយសមាជិក-សមាជិកា ដែលបានទៅចុះឈ្មោះបោះឆ្នោត មានចំនួន ៦៨ ភាគរយ នៃចំនួនចុះឈ្មោះបោះឆ្នោតសរុប ដែលមានចំនួន ៧, ៨ លាននាក់ ។ លោក សុខ ឥសាន បន្តទៀតថា គ្រាន់តែអ្នកបានចុះឈ្មោះរួច គឺមានចំនួនលើសពី៥០ភាគរយ នៃចំនួនអ្នកចុះឈ្មោះបោះឆ្នោត ចុះទំរាំ បូកជាមួយអ្នកមកសុំរួមរស់ ក្នុងជីវភាពនយោបាយ ជាមួយគណបក្សប្រជាជនកម្ពុជា ជាហូហែរ រៀងរាល់ថ្ងៃនោះ គឺគណបក្សប្រជាជនកម្ពុជា នឹងមានលទ្ធភាពឈ្នះឆ្នោត ដោយស្វ័យប្រវត្តិ មិនបាច់សង្ស័យឡើយ។ អ្នកនាំពាក្យបក្សកាន់អំណាថា ចំពោះគណបក្សសង្គ្រោះជាតិវិញ កាលពីបោះឆ្នោតឆ្នាំ២០១៣ គណបក្សនេះ បានឡើងសំឡេងដល់កំរិតខ្ពស់បំផុតហើយ គឺបានតែ ៥៥ កៅអីប៉ុណ្ណោះ ដោយរួមមាន សមាគមអ្នកប្រជាធិបតេយ្យ របស់លោកតា ម៉ម សូណង់ដូ ចូលរួម ខាងលោក សួន សេរីរដ្ឋា ក៏ជួយបោះឆ្នោតឲ្យផងដែរ។
- - - - - - - - - - - - - - - -
ប្រភព៖ដើមអម្ពិល
