គណបក្សសង្គ្រោះជាតិនឹងជ្រើសរើសអនុប្រធានម្ដងទៀតនៅសប្តាហ៍នេះ
គណបក្សសង្គ្រោះជាតិនឹងបើកកិច្ចប្រជុំជ្រើសរើសអនុប្រធានម្ដងទៀត បន្ទាប់ពីក្រសួងមហាផ្ទៃប្រកាសទទួលស្គាល់លក្ខន្ដិកៈថ្មីរបស់គណបក្ស។មន្ត្រីជាន់ខ្ពស់ និងជាតំណាងរាស្ត្រគណបក្សសង្គ្រោះជាតិ លោក ប៉ុល ហំម ឲ្យ ដឹងនៅថ្ងៃចន្ទនេះថា គណបក្សនេះនឹងបើកកិច្ចប្រជុំគណៈកម្មាធិការនាយកម្ដងទៀតនាថ្ងៃទី១៧ ខែឧសភានេះ ដើម្បីជ្រើសរើសអនុប្រធានបក្ស តបតាមការស្នើឡើងរបស់ក្រសួងមហាផ្ទៃ។លោកមានប្រសាសន៍ថា ការបើកកិច្ចប្រជុំនាយកនេះគឺដើម្បីឲ្យមានភាពត្រឹមត្រូវតាមនីតិវិធី ដែលមានចែងក្នុងលក្ខន្ដិកៈគណបក្ស។លោកថា៖ «និយាយមែនទែនផ្ទៃក្នុងយើង វាគ្មានស្អីទៀតទេ ព្រោះអនុម័តវាប៉ុន្មានដងរួចមកហើយ។ ខ្ញុំមិនដឹងទេ ក្រសួងមហាផ្ទៃ ប៉ុន្ដែខ្ញុំមើលទៅ វាគ្មានអីដែលមិនច្បាស់ទៀតទេ ពីព្រោះវាច្បាស់ណាស់ទៅហើយ ពីព្រោះយើងចែងចំអញ្ចឹងម៉ងថា នៅពេលអត់មានអនុប្រធាន គណៈកម្មាធិការនាយកត្រូវជ្រើសរើសអនុប្រធាន»។
ប្រភព៖VOD
