អាដហុក ហាក់លំបាកក្នុងការសុំចូលជួបមន្ត្រីខ្លួន ដែលកំពុងជាប់ឃុំ
អស់រយៈពេលជាងកន្លះខែហើយ សមាគមអាដហុក បានដាក់សំណើទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីសុំចូលជួបមន្ត្រីរបស់ខ្លួនទាំង៤រូប រួមទាំងមន្ត្រីគ.ជ.ប ១រូបទៀត ដែលកំពុងជាប់ឃុំ នៅក្នុងពន្ធនាគារ។ ប៉ុន្តែ រហូតមកដល់ពេលនេះ ចៅក្រមស៊ើបសួរ មិនទាន់ឆ្លើយតបនឹងសំណើរបស់សមាគមអាដហុក នោះទេ។លោក សំ ច័ន្ទគា អ្នកនាំពាក្យសមាគមអាដហុក បានប្រាប់សារព័តមានថ្មីៗ យ៉ាងដូច្នេះ តាមប្រព័ន្ធទូរសព្ទ នៅថ្ងៃទី១៨ ខែឧសភា ឆ្នាំ២0១៧នេះ។ពេលទៅសួរ មន្ត្រីសាលាដំបូងរាជធានីភ្នំពេញ បានប្រាប់យ៉ាងខ្លីថា សំណើរបស់សមាគមអាដហុក ដែលសុំចូលជួបអ្នកជាប់ឃុំក្នុងពន្ធនាគារ នៅមិនទាន់ទទួលបានការឆ្លើយតប ពីថ្នាក់លើនោះទេ។ មន្ត្រីសាលាដំបូងរាជធានីភ្នំពេញ មិនបញ្ជាក់នោះទេ ថាមូលហេតុអ្វី បានជាថ្នាក់លើ នៅតែមិនទាន់ឆ្លើយតបនឹងសំណើរបស់សមាគមអាដហុក។ ទាំងនេះ គឺជាការលើកឡើងរបស់លោក សំ ច័ន្ទគា ដដែល។
ប្រភព៖សារព័ត៌មានថ្មីៗ
