លោក ហ៊ុន សែន ប្រតិកម្មសារឃោសនានយោបាយបក្សប្រឆាំង
លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញបានប្រតិកម្មចំពោះសារនយោបាយឃោសនារបស់គណបក្ស សង្គ្រោះជាតិដែលមានលក្ខណៈមិនស្មោះត្រង់ ញុះញង់ និងលាបពណ៌ដែលជាពាក្យសម្ដីអាចបង្កទៅជាសង្គ្រាមរវាងគ្នា និងគ្នា។ប្រតិកម្មនេះធ្វើឡើង ខណៈយុទ្ធនាការឃោសនាបោះឆ្នោត ជ្រើសរើស ឃុំ-សង្កាត់ កំពុងដំណើរការដោយគណបក្សនយោបាយចំនួន ១២ ចូលរួមឲ្យគេបោះឆ្នោតឲ្យនៅថ្ងៃទី ៤ ខែមិថុនា ខាងមុខនេះ។នៅក្នុងពិធីសំណេះសំណាលជាមួយគ្រិស្ដបរិស័ទប្រមាណជាបួនពាន់នាក់នៅមជ្ឃមណ្ឌលកោះពេជ្រ លោក ហ៊ុន សែន ជាប្រធានគណបក្សប្រជាជនកម្ពុជាបានថ្លែងថា៖ «សង្គ្រាមងាយផ្ទុះណាស់ ខ្ញុំបាននិយាយពីសង្គ្រាម និងសន្តិភាពច្រើនហើយ អ្នកខ្លះគេនិយាយថាគេអត់កាំភ្លើងទេ ដូច្នេះសង្គ្រាមវាមិនកើតទេ តែខ្ញុំសូមរំឭកថាអត់មានកាំភ្លើងក៏សង្គ្រាមវាកើតមានដែរ សម្ដីរបស់អ្នកដែលជេរថាក្បត់ជាតិ ការប្រមាថមកលើគណបក្សប្រជាជន (ថា) អស់មនុស្សហែ យកយួនមកហែ នេះហើយជាសម្ដីសម្រាប់បង្កើតសង្គ្រាម បើគណបក្សប្រជាជនអត់ធ្មត់មិនបានហើយទៅដល់ផ្ទះអ្នកឯងហើយដុតផ្ទះអ្នកឯងចោល នោះហើយជាអ្វី»។
ប្រភព៖ភ្នំពេញប៉ុស្ដិ៍
