លោក កឹម សុខា៖ គណបក្សសង្គ្រោះជាតិ គឺជាគណបក្ស ដែលគិតពីអនាគតកាល
លោក កឹម សុខាប្រធានគណបក្សសង្រ្គោះជាតិនៅថ្ងៃទី២៧ ខែ ឧសភានេះក្នុងយុទ្ធនាការ ឃោសនា បោះ ឆ្នោតជ្រើសរើសក្រុមប្រឹក្សាឃុំ-សង្កាត់ នៅក្រុងស្ទឹងសែន ខេត្តកំពង់ធំ បានលើកឡើងថា គណបក្សសង្គ្រោះ ជាតិ គឺជាគណបក្សដែលគិតពី អនាគតនិងចង់បានការប្រកូតប្រជែង យកសន្លឹកឆ្នោតតាម រយៈទស្សនៈនយោបាយ។លោក កឹម សុខា បានសរសេរក្នុងបណ្ដាញសង្គមហ្វេសប៊ុកថា"គណបក្សសង្គ្រោះជាតិ ចង់បានការប្រកួតគ្នាក្នុង ការបោះឆ្នោត ទៅលើទស្សនៈនយោបាយរៀងៗខ្លួន ដោយបង្ហាញជូនប្រជាពលរដ្ឋ នូវអ្វីដែលខ្លួនយល់ឃើញ ថាល្អ ហើយត្រូវធ្វើជូនប្រជាពលរដ្ឋ និងប្រទេសជាតិនៅពេលដែលខ្លួន ទៅដឹកនាំមូលដ្ឋានឃុំ-សង្កាត់ និងទៅដឹកនាំប្រទេសជាតិ"។លោកបានសរសេរបន្ថែមថា" ជាក់ស្ដែង ក្នុងការបោះឆ្នោតពេលនេះ គណបក្សសង្គ្រោះជាតិ លើកយកគោល នយោបាយអាទិភាព៥ចំណុច ដើម្បីសុំការគាំទ្រពីប្រជាពលរដ្ឋ ដែលមានអាទិ៍៖ ១.ពង្រឹងសិទ្ធិអំណាច ប្រជាពលរដ្ឋ ២.លើកកម្ពស់ជីវភាពប្រជាពលរដ្ឋ ៣.ផ្ដល់សេវាដោយមិនរើសអើង ស្អាតស្អំ ទាន់ពេលវេលា ៤.ធានាការពារសន្ដិសុខសុវត្ថិភាពជូនប្រជាពលរដ្ឋ និង៥.ផ្ដល់កញ្ចប់ថវិកាជាតិកន្លះលានដុល្លាជាមធ្យមជូនឃុំ-សង្កាត់ក្នុងមួយឆ្នាំ សម្រាប់អភិវឌ្ឍន៍ខ្លួនឯង"៕
ប្រភព៖ដើមអម្ពិល
