តុលាការកោះហៅសកម្មជន CNRP ៥ រូបក្នុងរឿងទាស់ពាក្យសម្តីជាមួយ CPP
បេក្ខជនឈរឈ្មោះមេឃុំព្រៃខ្លាលេខរៀងទី ១ ក្នុងស្រុកកោះអណ្តែត និងសកម្មជនគណបក្សសង្គ្រោះជាតិចំនួន ៤ រូបផ្សេងទៀតត្រូវបានតុលាការខេត្តតាកែវកោះហៅឲ្យចូលទៅបំភ្លឺក្នុងនាមជាជនសង្ស័យនៅថ្ងៃទី ៣១ ខែឧសភាគឺ ៣ ថ្ងៃមុនថ្ងៃបោះឆ្នោតទាក់ទងនឹងដំណើររឿងបរិហារកេរ្តិ៍ជាសាធារណៈ ជេរប្រមាថជាសាធារណៈ និងញុះញង់ឲ្យប្រព្រឹត្តបទឧក្រិដ្ឋក្នុងរឿងដែលមានការទាស់ពាក្យសម្តីគ្នាជាមួយសកម្មជនគណបក្សប្រជាជនកាលពីថ្ងៃទី ២០ ខែឧសភាដែលជាថ្ងៃចាប់ផ្តើមបើកយុទ្ធនាការឃោសនាបោះឆ្នោត។៥ ថ្ងៃបន្ទាប់ពីមានការទាស់ពាក្យសម្តីគ្នាគឺនៅថ្ងៃទី ២៥ ខែឧសភាឆ្នាំ ២០១៧ តំណាងអយ្យការអមសាលាដំបូងខេត្តតាកែវលោក ទេព មុនិន្ទ បានចេញដីកាកោះហៅបេក្ខជនមេឃុំលេខរៀងទីមួយរបស់គណបក្សសង្គ្រោះជាតិនៅឃុំ ព្រៃខ្លា ស្រុកកោះអណ្តែត លោក កែវ អ៊ាត និងសកម្មជនគណបក្សសង្គ្រោះជាតិក្នុងឃុំដដែលនេះចំនួន ៤ រូបផ្សេងទៀតក្នុងនោះមានលោក ជុន ជឿន លោក ម៉ម សារឿន លោក សុខ សាង និងលោក ហែម កាន ឲ្យចូលបំភ្លឺនៅតុលាការនាថ្ងៃទី ៣១ ខែឧសភា។
ប្រភព៖ភ្នំពេញប៉ុស្ដិ៍
