ក្រសួងមហាផ្ទៃកំពុងស៊ើបអង្កេតលើNGOsខ្លះដែលខ្លួនចោទថា ធ្វើសកម្មភាពប៉ះពាល់បរិយាកាសនយោបាយ
នៅពេលនេះ ក្រសួងមហាផ្ទៃកម្ពុជាកំពុងតែតាមដានពិនិត្យ និងស៊ើបអង្កេតលើអង្គការក្រៅរដ្ឋាភិបាលមួយចំនួនដែលខ្លួនបានចោទថា បានប្រព្រឹត្តខុសតួនាទីនិងលក្ខន្តិកដោយបានធ្វើសកម្មភាព និងបញ្ចេញព័ត៌មានដែលធ្វើឲ្យល្អក់កករដល់បរិយាកាសនយោបាយកម្ពុជា។ បើតាមក្រសួងមហាផ្ទៃ ដរាបណាសមត្ថកិច្ចប្រមូលបានភស្តុតាងគ្រប់គ្រាន់ ដរាបនោះក្រសួងនឹងចាត់វិធានការទៅតាមច្បាប់ចំពោះអង្គការក្រៅរដ្ឋាភិបាលទាំងនោះភ្លាម។ក្រុមអង្គការក្រៅរដ្ឋាភិបាលដែលក្រសួងមហាផ្ទៃកំពុងពិនិត្យតាមដានទាំងនេះ ភាគច្រើនគឺជាអង្គការដែលធ្វើការលើផ្នែកសិទ្ធិមនុស្ស ប្រជាធិបតេយ្យ និងការបោះឆ្នោតដែលទទួលលុយពីបរទេសធ្វើសកម្មភាពនៅក្នុងប្រទេសកម្ពុជា។ យ៉ាងណាក៏ដោយ លោកខៀវ សុភ័គ អ្នកនាំពាក្យក្រសួងមហាផ្ទៃ មិនបង្ហាញឲ្យដឹងសោះឡើយអំពីចំនួនជាក់លាក់ និងទីតាំងរបស់អង្គការទាំងនោះ។ នេះក៏ព្រោះថា វាកំពុងស្ថិតក្នុងដំណើរការពិនិត្យនិងស៊ើបអង្កេត។
ប្រភព៖RFI
