លោក ហ៊ុន សែន ស្នើឲ្យគណបក្សនយោបាយទាំងអស់ បង្ហាញមុខបេក្ខភាពក្រុមប្រឹក្សាឃុំ សង្កាត់
លោក ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជាផងដែរនោះ បានអំពាវនាវដល់ គណបក្សនយោបាយ ដែលបានចូលរួមប្រកួតប្រជែងការបោះឆ្នោតក្រុមប្រឹក្សាឃុំ សង្កាត់ អាណត្តិទី៤ ឲ្យបង្ហាញមុខបេក្ខភាពក្រុមប្រឹក្សា ឃុំ សង្កាត់ របស់ខ្លួនជូនប្រជាពលរដ្ឋជាម្ចាស់ ដើម្បីពួកគាត់ពិចារណាបោះឆ្នោតជូន។លោក ហ៊ុន សែន បានគូសបញ្ជាក់នៅលើទំព័រ Facebook នៅថ្ងៃព្រហស្បត្តិ៍ ទី១ ខែមិថុនា ឆ្នាំ២០១៧នេះថា គណបក្សនយោ បាយខ្លះមិនទាន់ហ៊ានបង្ហាញមុខបេក្ខជនឈរឈ្មោះឲ្យប្រជាជនបានស្គាល់នៅឡើយ ខណៈបេក្ខជនរបស់គណបក្សនយោបាយខ្លះ បានបោះបង់ចោលបក្សទៅចូលរួមជាមួយបក្សនយោបាយផ្សេងរួចទៅហើយ។លោក បានបញ្ជាក់យ៉ាងដូច្នេះ «បើបងប្អូនមិនស្គាល់បេក្ខជនឈរឈ្មោះ តើបងប្អូនបោះឆ្នោតជូនរបៀបណា? ព្រោះអ្នកទាំងនេះ ត្រូវនៅជាមួយបងប្អូនរយៈពេល៥ឆ្នាំ ប្រសិនគេជាប់ឆ្នោត។ យើងសង្ឃឹមថា គណបក្សនយោបាយទាំងអស់នឹងបង្ហាញមុខ បេក្ខជនឈរឈ្មោះ ឲ្យប្រជាជនបានស្គាល់ ដើម្បីងាយស្រួលដល់ការសម្រេចចិត្តរបស់ប្រជាជនក្នុងការបោះឆ្នោតជូន»។
ប្រភព៖Fresh news
