លោកនាយករដ្ឋមន្ត្រី ហ៊ុន សែន អំពាវនាវឲ្យពលរដ្ឋផ្អាកផឹក និងលក់គ្រឿងស្រវឹង
លោក ហ៊ុន សែន ប្រធានគណបក្សប្រជាជនកម្ពុជា បានអំពាវនាវពលរដ្ឋកុំឲ្យលក់ និងផឹកគ្រឿងស្រវឹង ចាប់ពីថ្ងៃស្អែក ថ្ងៃទី៣ ខែមិថុនា និងនៅថ្ងៃទី៤ ខែមិថុនា ដែលជាថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់។
នៅក្នុងយុទ្ធនាការឃោសនាបោះឆ្នោតថ្ងៃចុងក្រោយ លោក ហ៊ុន សែន បានថ្លែងពីលើវេទិកានៅផ្លូវ៦០ម៉ែត្រ ក្នុងសង្កាត់ចាក់អង្រែលើ បន្តថាការលក់ និងទទួលទានគ្រឿងស្រវឹងរង់ចាំថ្ងៃចន្ទក៏បានដែរ។
ការអំពាវនាវនេះ ដូចទៅនឹងសេចក្ដីណែនាំស្ដីពីការផ្អាកលក់គ្រឿងស្រវឹងរបស់រដ្ឋាភិបាល នៅថ្ងៃទី២៨ ខែឧសភាដែរ។ ការពិសាគ្រឿងស្រវឹង ដែលរដ្ឋាភិបាលមើលឃើញថា អាចបង្កឲ្យមានអំពើហិង្សា គ្រោះថ្នាក់ចរាចរណ៍ គ្រោះថ្នាក់សង្គម ការប្រព្រឹត្តបទល្មើសនានា ឬករណីខ្លះអាចបណ្ដាលឲ្យបាត់បង់សណ្ដាប់ធ្នាប់សាធារណៈ៕
ប្រភព៖សារព័ត៌មានថ្មីៗ
