បក្សប្រឆាំងនៅបាត់ដំបង ប្ដឹងឲ្យរាប់សន្លឹកឆ្នោតឡើងវិញ
បណ្តឹងឲ្យរាប់សន្លឹកឆ្នោតឡើងវិញនៅឃុំចំនួន ២ ក្នុងខេត្តបាត់ដំបងត្រូវបានតំណាងគណបក្សសង្គ្រោះជាតិប្ដឹងជាផ្នែកមួយនៃបណ្ដឹងបឋមចំនួន ២០ របស់គណបក្សប្រឆាំងដែលបានប្ដឹង ខណៈបណ្ដឹង គជប ទទួលបានពីគ្រប់គណបក្សមានជាង ៧០ ទាក់ទងនឹងការបោះឆ្នោតឃុំ-សង្កាត់លើកនេះ។ប្រធានប្រតិបត្តិគណបក្សសង្គ្រោះជាតិខេត្តបាត់ដំបងលោក ជា ជេវ ប្រាប់ភ្នំពេញប៉ុស្តិ៍តាមទូរស័ព្ទពីម្សិលមិញថាគណបក្សបានដាក់ពាក្យបណ្តឹងទៅមន្ត្រីរៀបចំការបោះឆ្នោតនៅឃុំតាគ្រាម ស្រុកបាណន់ និងឃុំបឹងប្រាំ ស្រុកបវេល រួចហើយកាលពីថ្ងៃទី ៥ ខែមិថុនា។លោកថាពាក្យបណ្តឹងនេះទាមទារឲ្យរាប់សន្លឹកឆ្នោតនៅតាមការិយាល័យមួយចំនួនឡើងវិញដោយសារពេលរាប់សន្លឹកឆ្នោតប្រធានការិយាល័យបានចាត់ទុកសន្លឹកឆ្នោតដែលគាំទ្រដល់គណបក្សសង្គ្រោះជាតិមួយចំនួនថាមិនបានការ។លោកឲ្យដឹងថាសន្លឹកឆ្នោតខ្លះត្រូវបានពលរដ្ឋគូសលើសញ្ញាគណបក្ស និងខ្លះគូសក្នុងប្រអប់បួនជ្រុងធំតែម្តងដោយមិនបានគូសក្នុងប្រអប់តូចនោះទេ។ ករណីនេះលោកថាសន្លឹកឆ្នោតទាំងនោះគួរតែចាត់ទុកបានការ។
ប្រភព៖ភ្នំពេញប៉ុស្ដិ៍
