តុលាការ នឹងកាត់ទោសលោក គឹម សុខ នៅចុងខែនេះ
ការស៊ើបសួរលើសំណុំរឿងលោក គឹម សុខ អ្នកវិភាគនយោបាយ ដែលកំពុងជាប់ឃុំដោយសារតែបណ្តឹងរបស់លោកនាយករដ្ឋមន្ត្រី ហ៊ុន សែន ត្រូវបានបិទបញ្ចប់ហើយ។ ក្រោយបញ្ចប់ការស៊ើបសួរ សំណុំរឿងនេះ ក៏ត្រូវបានបញ្ជូនទៅជំនុំជម្រះ។លោក ជូង ជូងី មេធាវីការពារក្តីឲ្យលោក គឹម សុខ បានប្រាប់សារព័ត៌មានថ្មីៗថា លោក បានទទួលដីការបស់សាលាដំបូងរាជធានីភ្នំពេញហើយ ទាក់ទងនឹងការបើកសវនាការជំនុំជម្រះលើសំណុំរឿងខាងលើ។ បើតាមលោកមេធាវី ជូង ជូងី ការបើកសវនាការនេះ នឹងធ្វើឡើងនៅថ្ងៃទី២៧ ខែកក្កដា ឆ្នាំ២0១៧។
លោកមេធាវី និយាយដូច្នេះថា៖«ខ្ញុំ នឹងចូលរួមសវនាការ ដើម្បីការពារក្តីឲ្យគាត់ [លោក គឹម សុខ]។ ដោយសារតែគាត់ ស្ថិតនៅក្រោមការគ្រប់គ្រងរបស់ពន្ធនាគារ ដូច្នេះមន្ត្រីពន្ធនាគារ នឹងដឹកគាត់ទៅ ចូលរួមសវនាការ»។
ប្រភព៖សារព័ត៌មានថ្មីៗ
