គណបក្សប្រជាជនកម្ពុជាប្រកាសផ្ដាច់សម្ពន្ធភាពជាមួយគណបក្សខ្មែររួបរួមជាតិ
មន្ត្រីជាន់ខ្ពស់គណបក្សប្រជាជនកម្ពុជា ប្រកាសថា ពីពេលនេះតទៅ សម្ពន្ធភាពដែលធ្លាប់មានជាមួយលោក ញឹក ប៊ុនឆៃ ត្រូវកាត់ផ្ដាច់ហើយ។ គណបក្សកាន់អំណាចចោទប្រកាន់ថា លោក ញឹក ប៊ុនឆៃ ថាក្បត់សម្ពន្ធភាពជាមួយបក្សកាន់អំណាច ហេតុនេះមិនអាចបន្តឲ្យមានទំនាក់ទំនងតទៅទៀតឡើយ។ ស្របពេលគណបក្សប្រជាជនកម្ពុជា ប្រកាន់ជំហរបោះបង់សម្ពន្ធភាពជាមួយលោក ញឹក ប៊ុនឆៃ មានមន្ត្រីមួយចំនួនត្រូវបានបញ្ចប់មុខតំណែងពីតួនាទីជាទីប្រឹក្សារដ្ឋាភិបាលជាបន្តបន្ទាប់ដែរ។គណបក្សប្រជាជនកម្ពុជា ប្ដេជ្ញាថានឹងបន្តទៅបញ្ចប់មុខតំណែងមន្ត្រីមួយចំនួនទៀត ដែលជាសមាជិករបស់លោក ញឹក ប៊ុនឆៃ នៅជាទីប្រឹក្សារដ្ឋាភិបាល ឬមន្ត្រីនៅក្នុងតំណែងនៃស្ថាប័នណាមួយ។លោក សុខ ឥសាន អ្នកនាំពាក្យគណបក្សកាន់អំណាចអះអាងដោយសុទិដ្ឋិនិយមថា រដ្ឋាភិបាលនឹងមិនបន្តសហការជាមួយមនុស្សដែលក្បត់សម្ពន្ធភាពដូចលោក ញឹក ប៊ុនឆៃ តទៅទៀតទេ។
ប្រភព៖RFA
