សេចក្តីស្នើច្បាប់ស្តីពីវិសោធនកម្មច្បាប់បោះឆ្នោត របស់បក្សប្រឆាំងនឹងត្រូវលើកយកទៅជជែកនៅសប្តាហ៍ក្រោយ
គណៈកម្មាធិការអចិន្ត្រៃយ៍រដ្ឋសភានឹងបើកកិច្ចប្រជុំនៅថ្ងៃចន្ទខាងមុខ ជុំវិញសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលស្នើឡើងដោយអ្នកតំណាងរាស្ត្រគណបក្សប្រឆាំងចំនួន៣៣រូប។ ការសម្រេចបើកកិច្ចប្រជុំគណៈអចិន្ត្រៃយ៍នៅសប្តាហ៍ក្រោយនេះ បានធ្វើឡើងបន្ទាប់ពីលោកសុន ឆ័យ បានដាក់លិខិត ទៅកាន់ប្រធានរដ្ឋសភា កាលពីថ្ងៃទី១១ខែសីហា កន្លងទៅ ក្នុងគោលបំណងចង់កែប្រែមាត្រាចំនួន៣នៃច្បាប់បោះឆ្នោត ដើម្បីឲ្យប្រជាពលរដ្ឋខ្មែរនៅក្រៅប្រទេសអាចចូលរួមបោះឆ្នោតបាន។អគ្គលេខាធិការរដ្ឋសភាលោក ឡេង ប៉េងឡុង ថ្លែងប្រាប់វិទ្យុបារាំងអន្តរជាតិ RFI នៅព្រឹកនេះថា សេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលស្នើដោយអ្នកតំណាងរាស្ត្រគណបក្សសង្គ្រោះជាតិ នឹងត្រូវដាក់ជូនគណៈកម្មាធិការអចិន្ត្រៃយ៍រដ្ឋសភានៅថ្ងៃចន្ទទី២១សីហាខាងមុខ ដើម្បីពិភាក្សាបន្ទាប់ពីលោកទទួលបានលិខិតនេះ ហើយបញ្ជូនទៅកាន់ប្រធានរដ្ឋសភាលោក ហេង សំរិន។
ប្រភព៖RFI
