លោក កឹម សុខា៖ មិនចាំបាច់ឱបរឹតគ្នាទេ ត្រឹមចាប់ដៃគ្នាកសាងកម្ពុជាទៅបានហើយ
លោក កឹម សុខា មេដឹកនាំបក្សប្រឆាំង បានលើកឡើងថា អ្នកនយោបាយកម្ពុជា មិនត្រូវកាប់សម្លាប់គ្នា ហើយក៏មិនចាំបាច់ឱបរឹតគ្នាដែរ ផ្ទុយទៅវិញ លោកស្នើឲ្យមានត្រឹមតែចាប់ដៃគ្នាដើម្បីកសាងប្រទេសកម្ពុជា ឲ្យមានការផ្លាស់ប្ដូរជាវិជ្ជមាន និងផ្ដល់ភាពរីកចម្រើនសម្រាប់ប្រជាពលរដ្ឋខ្មែរបានហើយ។លោក កឹម សុខា បានលើកឡើងបែបនេះ ជាង ២ឆ្នាំក្រោយពីលោកនាយករដ្ឋមន្ត្រី ហ៊ុន សែន និងអតីតមេដឹកនាំបក្សប្រឆាំង លោក សម រង្ស៊ី បានកសាងទំនាក់ទំនងល្អូកល្អឺននឹងគ្នាអស់រយៈពេលប៉ុន្មានខែកាលពីឆ្នាំ២០១៥ រហូតដល់អ្នកទាំងពីរបានចូលរួមបុណ្យអង្គរសង្ក្រានរួមគ្នានៅឯខេត្តសៀមរាបនៅខែមេសា ហើយចុងក្រោយក្រុមគ្រួសារនៃអ្នកនយោបាយទាំងពីរនេះ បានជួបជុំគ្នាបរិភោគអាហារពេលល្ងាចនៅរាជធានីភ្នំពេញ នៅក្នុងខែកក្កដា។ទំនាក់ទំនងដ៏ល្អរយៈពេលខ្លីរបស់មេដឹកនាំនយោបាយទាំងពីរនាពេលនោះ ត្រូវបានគេមើលឃើញថា កើតឡើងក្រោយពីមានកិច្ចព្រមព្រៀងនយោបាយ និងវប្បធម៌សន្ទនា បន្ទាប់ពីការជាប់គាំងនយោបាយនៅក្រោយការបោះឆ្នោតជាតិឆ្នាំ២០១៣។
ប្រភព៖VOD
