មហាផ្ទៃ កំណត់បែបបទថ្មី នៃការបញ្ជាក់ទីលំនៅ ដែលបម្រើឲ្យការចុះឈ្មោះបោះឆ្នោត
ក្រសួងមហាផ្ទៃ បានចេញប្រកាស ដើម្បីបង្ហាញពីនីតិវិធីថ្មី ក្នុងការចេញលិខិតបញ្ជាក់លំនៅដ្ឋាន ដល់ប្រជាពលរដ្ឋ នៅតាមឃុំ-សង្កាត់ សម្រាប់យកទៅប្រើប្រាស់ក្នុងការចុះឈ្មោះបោះឆ្នោត។បើតាមប្រកាស ដែលចុះហត្ថលេខាដោយលោក ស ខេង រដ្ឋមន្ត្រីក្រសួងមហាផ្ទៃ ទីសំណាក់ មានន័យសំដៅលើទីស្ថាន ដែលបុគ្គលណាម្នាក់ ស្នាក់អាស្រ័យជាក់ស្តែងក្នុងរយៈពេលកំណត់ណាមួយ ហើយបើស្នាក់អាស្រ័យចាប់ពី៣0ថ្ងៃ ឡើងទៅ បុគ្គលនោះ អាចសុំចុះបញ្ជីស្នាក់នៅបណ្តោះអាសន្ន និងអាចទទួលបានលិខិតអនុញ្ញាតឲ្យស្នាក់នៅបណ្តោះអាសន្ន ដែលចេញដោយប៉ុស្តិ៍នគរបាលឃុំ-សង្កាត់។ប្រកាសរបស់ក្រសួងមហាផ្ទៃ បានកំណត់នីតិវិធីថ្មី បែបនេះថា៖«ដើម្បីទទួលបានលិខិតបញ្ជាក់លំនៅដ្ឋាន ប្រជាពលរដ្ឋ ត្រូវមានអត្តសញ្ញាណបណ្ណសញ្ជាតិខ្មែរ លិខិតឲ្យស្នាក់នៅបណ្តោះអាសន្ន ដែលចេញដោយប៉ុស្តិ៍នគរបាលឃុំ-សង្កាត់ និងមានសាក្សីម្នាក់ ដែលមានសិទ្ធិបោះឆ្នោត ក្នុងឃុំ-សង្កាត់ ជាមួយគ្នា»។
ប្រភព៖សារព័ត៌មានថ្មីៗ
