កំពូលពន្យាររឿងចៅសង្កាត់ CNRP សុំនៅក្រៅឃុំ
ឈរនៅក្នុងរង្វង់ក្រចកសេះនៅក្នុងសវនាការតុលាការកំពូលកាលពីថ្ងៃម្សិលមិញ បេក្ខជនជាប់ឆ្នោតពីគណបក្សសង្គ្រោះជាតិលោក ចៅ វាសនា បានស្នើដល់តុលាការកំពូលឲ្យដោះលែងខ្លួនបាននៅក្រៅឃុំបណ្តោះអាសន្នក្នុងបណ្តឹងសុំនៅក្រៅឃុំពាក់ព័ន្ធការចូលរួមបាតុកម្មរបស់ក្រុមកម្មករអូសរទេះនៅក្រុងប៉ោយប៉ែត កាលពីឆ្នាំ ២០១៥។ប៉ុន្តែសាលដីកានេះមិនត្រូវបានប្រកាសភ្លាមៗ ក្រោយពីបញ្ចប់សវនាការនោះទេ ដោយសំណុំរឿងនេះនឹងត្រូវប្រកាសសាលដីកានៅថ្ងៃទី ៤ កញ្ញាដោយបានផ្តល់សិទ្ធិទៅឲ្យមេធាវីការពារក្តីក្នុងការពន្យល់ពីអង្គហេតុ នោះលោកចៅ វាសនា ដែលជាជនត្រូវចោទហាក់មិនបាននិយាយអ្វីច្រើនទេនៅក្នុងបន្ទប់សវនាការ និងបានថ្លែងស្នើទៅកាន់ចៅក្រមថា៖ «ខ្ញុំប្តឹងមកនេះស្នើដល់តុលាការអនុញ្ញាតឲ្យខ្ញុំបាននៅក្រៅឃុំព្រោះខ្ញុំមានជំងឺក្រួសក្នុងថង់ប្រមាត់ ឡើងជាតិអាស៊ីត និងខ្វះកាល់ស្យូម ម្យ៉ាងខ្ញុំមានលំនៅឋានពិតប្រាកដ និងជាចៅសង្កាត់ផង។ ដូច្នេះ ខ្ញុំស្នើដល់ចៅក្រមដោះលែងខ្ញុំបាននៅក្រៅឃុំ ដើម្បីចេញទៅព្យាបាលជំងឺ»។
ប្រភព៖ភ្នំពេញប៉ុស្ដិ៍
