តំណាងរាស្ត្របក្សប្រឆាំងគ្រោងដាក់លិខិតទៅក្រសួងព័ត៌មានសួរអំពីការបិទវិទ្យុក្នុងស្រុកមួយចំនួន
ប្រធានក្រុមអ្នកតំណាងរាស្ត្រគណបក្សប្រឆាំងកំពុងសិក្សាបញ្ហាដែលនាំអោយរដ្ឋាភិបាលបិទទ្វារវិទ្យាស្ថានជាតិប្រជាធិបតេយ្យ (NDI) របស់សហរដ្ឋអាមេរិក និងស្ថានីយវិទ្យុមួយចំនួនដែលផ្សាយបន្តកម្មវិធីព័ត៌មានរបស់វិទ្យុអាស៊ីសេរី (RFA) សំឡេងសហរដ្ឋអាមេរិក (VOA) វិទ្យុសំឡេងប្រជាធិបតេយ្យ (VOD) និងវិទ្យុដែលផ្សាយកម្មវិធីរបស់គណបក្សប្រឆាំង រួមនឹងគម្រោងបិទការផ្សាយរបស់កាសែត ឌឹ ខេមបូឌា ដេលី (The Cambodia Daily)។ករណីនេះអ្នកតំណាងរាស្ត្រគណបក្សកាន់អំណាចអះអាងថា គេពុំមានការសង្ស័យចំពោះការអនុវត្តច្បាប់របស់រដ្ឋាភិបាលឡើយ បើទោះបីជាករណីនេះមានការរិះគន់ពីស្ថាប័ននានារបស់ពិភពលោក រួមទាំងអង្គការសហប្រជាជាតិក្ដី។អ្នកតំណាងរាស្ត្រគណបក្សប្រឆាំងគ្រោងនឹងដាក់លិខិតទៅសួរនាំក្រសួងព័ត៌មាន នៅសប្ដាហ៍ក្រោយ ដើម្បីសួរបញ្ជាក់ព័ត៌មាននានា ទាក់ទងនឹងការបិទវិទ្យុក្នុងស្រុកមួយចំនួន។
ប្រភព៖RFA
