លោកនាយករដ្ឋមន្រ្តី ហ៊ុន សែន ព្រមានប្រទេសដទៃកុំឲ្យឈឺឆ្អាលរឿងការចាប់ខ្លួនលោក កឹម សុខា
ប្រមុខរដ្ឋាភិបាលកម្ពុជា លោក ហ៊ុន សែន បញ្ចេញប្រតិកម្មខ្លាំងៗចំពោះសហគមន៍អន្តរជាតិដែលបានចេញសេចក្តីថ្លែងការណ៍ថ្កោលទោសរដ្ឋាភិបាលកម្ពុជា ចំពោះការចាប់ខ្លួនលោក កឹម សុខា។ លោកចាត់ទុកសេចក្តីថ្លែងការណ៍ទាំងនោះ គឺគ្រាន់តែជាការការពារមេបក្សប្រឆាំងឲ្យរួចផុតពីការចោទប្រកាន់តែប៉ុណ្ណោះ។ ទោះបីជាបែបនេះក្តី សហគមន៍អន្តរជាតិនៅតែបន្តចេញសេចក្តីថ្លែងការណ៍ថ្កោលទោស និងទាមទារឲ្យមានការដោះលែងលោក កឹម សុខា ដដែល។លោកនាយករដ្ឋមន្ត្រី ហ៊ុន សែន ហៅប្រធានគណបក្សសង្គ្រោះជាតិ ថាជា “អាយ៉ង” របស់បរទេស ហើយលោកបានទាត់ចោលសេចក្តីថ្លែងការណ៍ទាំងអម្បាលម៉ានរបស់សហគមន៍អន្តរជាតិជុំវិញការចាប់ខ្លួនលោក កឹម សុខា៖ «អ្នកដែលបានធ្វើសេចក្តីថ្លែងការណ៍ដើម្បីការពារជននេះ គឺគ្រាន់តែដើម្បីការពារអាយ៉ងរបស់ខ្លួន ដើម្បីឲ្យរួចផុតពីការចោទប្រកាន់តែប៉ុណ្ណោះ។ សូមគោរពអធិបតេយ្យភាពជាតិរបស់កម្ពុជា មិនត្រូវប្រើវិធីផ្តួលរំលំតាមរយៈបដិវត្តន៍ពណ៌នោះទេ»។
ប្រភព៖RFA
