រដ្ឋសភារង់ចាំដីកាពីតុលាការមុនមានចំណាត់ការលើអភ័យឯកសិទ្ធិលោក កឹម សុខា
រដ្ឋសភានៅមិនទាន់មានចំណាត់ការបែបណានោះទេចំពោះករណីការចាប់ខ្លួនលោក កឹម សុខា ដោយគ្មានការដកអភ័យឯកសិទ្ធិតំណាងរាស្ត្ររដ្ឋសភាជាមុន។ អ្នកវិភាគដាក់ការសង្ស័យថា មុនការចាប់លោក កឹម សុខា រដ្ឋាភិបាលបានបិទវិទ្យុផ្សាយបន្តរបស់សារព័ត៌មានឯករាជ្យមួយចំនួន ដែលនេះប្រហែលជាយុទ្ធសាស្ត្ររដ្ឋាភិបាលរៀបចំទុកជាមុន ដើម្បីបំបិទសំឡេងកុំឲ្យពលរដ្ឋបានដឹង។ទោះជាគ្មានដីកា ក៏លោក កឹម សុខា ត្រូវបានសមត្ថកិច្ចចាប់វាយខ្នោះដែរ។ អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង ឲ្យដឹងថា រដ្ឋសភាកំពុងរង់ចាំដីកាពីតុលាការមុននឹងមានចំណាត់ការបែបណាលើការចាប់ខ្លួនសមាជិករបស់រដ្ឋសភា គឺលោក កឹម សុខា។ លោក បន្តថា រដ្ឋសភាទើបតែទទួលបានរបាយការណ៍ពីប៉ូលិស ប៉ុន្តែមិនទាន់បានឃើញការចោទប្រកាន់ពីតំណាងអយ្យការនៅឡើយទេ៖ «អ្វីដែលយើងចាត់ចែងបាន លុះត្រាតែមានការចោទប្រកាន់ពីអយ្យការ។ ឥឡូវយើងមិនទាន់ទទួលបានរបាយការណ៍ពីអយ្យការ លើកលែងការចោទប្រកាន់អីនៅឡើយទេ ដូច្នេះយើងមិនទាន់ធ្វើអីទេ ... ចាត់វិធានការទៅតាមរដ្ឋធម្មនុញ្ញ ទៅតាមច្បាប់»។
ប្រភព៖RFA
