សង្គ្រោះជាតិ មិនតែងតាំងប្រធានថ្មីទេ ខណៈ UN សម្តែងការព្រួយបារម្ភយ៉ាងខ្លាំង
គណបក្សសង្គ្រោះជាតិ នឹងមិនធ្វើការតែងតាំងប្រធានថ្មី ជំនួសលោក កឹម សុខា នោះទេ ខណៈដែលអង្គការសហប្រជាជាតិ បានសម្តែងការព្រួយបារម្ភយ៉ាងខ្លាំង ចំពោះការឆ្មក់ចូលចាប់ខ្លួនមេបក្សប្រឆាំង ទាំងយប់រំលងអធ្រាត្រឈានចូលថ្ងៃទី៣ ខែកញ្ញា ហើយបានបញ្ជូនយកទៅឃុំខ្លួនភ្លាមៗ នៅឯពន្ធនាគារត្រពាំងផ្លុងក្នុងខេត្ត ត្បូងឃ្មុំ ចោទពីបទ «ក្បត់ជាតិ»។ក្នុងអំឡុងបទសម្ភាសកាលពីម្សិលមិញ អនុប្រធានគណបក្សសង្គ្រោះជាតិ លោកស្រី មូរ សុខហួរ បានថ្លែងថា ការតែងតាំងប្រធានថ្មី នឹងធ្វើឲ្យគណបក្សសង្គ្រោះជាតិក្លាយជា «អ្នកសមគំនិត ចំពោះការបំផ្លាញប្រជាធិបតេយ្យ»។កាលពីខែកុម្ភៈសភាជាតិ បានអនុម័តវិសោធនកម្មច្បាប់ស្តីពីគណបក្សនយោបាយដ៏ចម្រូងចម្រាសដែលហាមគណបក្សនយោបាយ មិនឲ្យមានការពាក់ព័ន្ធជាមួយនឹងទណ្ឌិត។លិខិតរបស់អ្នកអានមួយច្បាប់ ដែលសរសេរទៅសារព័ត៌មាន Fresh News ដែលជាសារព័ត៌មានស្និទ្ធនឹងលោកនាយករដ្ឋមន្ត្រី ហ៊ុន សែន កាលពីម្សិលមិញ ទំនងជាផ្តល់នូវជម្រើសមួយដល់គណបក្សប្រឆាំង ដោយជំរុញឲ្យលោក កឹម សុខា ចុះចេញពីតំណែងប្រធាន ហើយឲ្យអនុប្រធាន លោក ប៉ុល ហំម ឡើងកាន់តំណែងជំនួស។
ប្រភព៖ភ្នំពេញប៉ុស្ដិ៍
