គ.ជ.ប បានចេញសេចក្តីប្រកាសព័ត៌មានបញ្ជាក់ពីជំហររបស់ខ្លួនថា ជាស្ថាប័នឯករាជ្យភាព អព្យាក្រឹត្យភាព និងយុត្តិធម៌
ដោយមិនលើកចំឈ្មោះអ្នកលេងហ្វេសប៊ុកណាម្នាក់ គ.ជ.ប កាលពីថ្ងៃសៅរ៍ បានចេញសេចក្តីប្រកាសព័ត៌មានបញ្ជាក់ពីជំហររបស់ខ្លួនថា ជាស្ថាប័នឯករាជ្យភាព អព្យាក្រឹត្យភាព និងយុត្តិធម៌ ព្រមទាំងបានបង្ហាញរបៀបស្វែងរកព័ត៌មានអំពីបដិវត្តន៍ពណ៌។ក្នុងសេចក្តីប្រកាសព័ត៌មានដែលរួមមានទាំងភាសាអង់គ្លេសផងដែរនោះបានសរសេរថា៖ «ដោយកត់សម្គាល់ឃើញថា ពួកអគតិបានបំផ្លោងព័ត៌មានវាយប្រហារមកលើការងារ គ.ជ.ប ប្រកបដោយល្បិចកលខ្មៅកខ្វក់ ក្នុងបំណងបំផ្លាញទំនុកចិត្តសាធារណៈមតិ លើដំណើរការរៀបចំការបោះឆ្នោតឆ្នាំ២០១៨ ខាងមុខ គ.ជ.ប សូមធ្វើការបកស្រាយ... ជំហរដឹកនាំរបស់ គ.ជ.ប ថ្មីនេះ ទោះជាសមាសភាពមកពីមជ្ឈដ្ឋានណាក៏ដោយ ក៏ត្រូវតែរៀបចំការបោះឆ្នោតឱ្យបានត្រឹមត្រូវបំផុតស្របតាមច្បាប់កំណត់។ គ្មានបុគ្គលណា សមាសភាពណា អង្គការណា អង្គភាពណា បរទេសណា អាចមកដាក់សម្ពាធឬប្រទាញ គ.ជ.ប ឱ្យអនុវត្តប្រាសចាកពីគតិច្បាប់ក្នុងការរៀបចំការបោះឆ្នោតនេះបានឡើយ»។
ប្រភព៖ភ្នំពេញប៉ុស្ដិ៍
