ព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិចបានស្នើសុំជំនួយពីរដ្ឋាភិបាលចិនដើម្បីគាំទ្រដល់គណបក្សរាជានិយម
ព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិចដែលទើបតែទទួលកៅអីនៅក្នុងរដ្ឋសភាមិនទាន់បានមួយខែផងនោះកាលពីម្សិលមិញបានស្នើសុំជំនួយពីរដ្ឋាភិបាលចិនដើម្បីគាំទ្រដល់គណបក្សរាជានិយមដែលកំពុងធ្លាក់ខ្លួនក្រីក្រក្នុងចំណោមគណបក្សដែលមានកៅអីនៅក្នុងរដ្ឋសភា។ព្រះអង្គម្ចាស់បានមានព្រះបន្ទូលឲ្យដឹងថាការស្នើសុំនេះបានធ្វើឡើងក្នុងជំនួបទ្វេភាគីរវាងព្រះអង្គ និងលោក វ៉ាង វៃគួង ប្រធានវិទ្យាស្ថានវិទ្យាសាស្ត្រសង្គមនៃសាធារណរដ្ឋប្រជាមានិតចិននៅសណ្ឋាគារ intercontinental Hotel កាលពីព្រឹកថ្ងៃទី ២៥ ខែធ្នូ ឆ្នាំ ២០១៧។ព្រះអង្គមានបន្ទូលថា៖ «ខ្ញុំបានស្នើថាប្រទេសចិនដែលបានជួយដល់យើងខ្ញុំហើយការពិតយើងខ្ញុំក្លាយទៅជាគណបក្សទី ២ មែន ក៏ប៉ុន្តែវាក្រជាងគេ វាក្រជាងគេតែម្ដង វាគ្មានអីសោះហើយចិនគាត់ថាចាំគាត់រាយការណ៍ជូនឯកឧត្តម ស៊ី ជីនភីង (ប្រធានាធិបតី) ហើយគាត់នឹងបន្តនៅជាមួយដែលគាត់ធ្លាប់បានផ្តល់ឲ្យមកហ៊្វុនស៊ិនប៉ិច តទៅទៀត»។
ប្រភព៖ភ្នំពេញប៉ុស្ដិ៍
