Cambodian Voter's Voice

គណបក្សទាំងពីរលុបចោលគម្រោងចរចារ នៅសប្តាហ៍នេះ

2014-02-25 03:30:00 5205 Views

មន្ត្រីអ្នកនាំពាក្យគណបក្សសង្គ្រោះជាតិ លោកយឹម សុវណ្ណ បានឱ្យដឹងនៅព្រឹកថ្ងៃអង្គារ ទី២៥ ខែកុម្ភះនេះថា គណបក្សប្រជាជនកម្ពុជា និងគណបក្សសង្គ្រោះជាតិ បានសម្រេចលុបចោលគម្រោងជួបចរចាជាថ្មី រវាងគណៈកម្មការចម្រុះ សម្រាប់កែទម្រង់ការបោះឆ្នោត ដែលមានសមាសភាព ៦ រូបម្ខាង នៅថ្ងៃទី២៧ ខែកុម្ភៈ ឆ្នាំ២០១៤។ លោកបាន បញ្ជាក់ថា ការសម្រេចលើកពេលជួបចរចា រវាងក្រុមការងារគណបក្សទាំងពីរ ក្នុងនាមគណៈកម្មការចម្រុះ សម្រាប់កែទម្រង់ការបោះឆ្នោត ដែលមានសមាសភាពម្ខាង ៦ រូប នាថ្ងៃទី២៧កុម្ភៈ មិនមែនមកពីហេតុផលនយោបាយទេ តែដោយសារតែបញ្ហាបច្ចេកទេសរបស់ក្រុមការងារគណបក្សទាំងពីរ។

នៅព្រឹកថ្ងៃទី២៥កុម្ភៈនេះ មិនអាចទាក់ទងលោកព្រុំសុខា ប្រធានក្រុមការងារចរចាបច្ចេកទេស របស់គណបក្សប្រជាជនកម្ពុជា រួមទាំងលោក ជាម យៀប សមាជិកជាន់ខ្ពស់ និងជាសមាជិកគណៈកម្មការចម្រុះ សម្រាប់កែទម្រង់ការបោះឆ្នោត ខាងគណបក្សប្រជាជនកម្ពុជា បានទេ។ ដកស្រង់ពីគេហទំព័រសម្លេងសារព័ត៌មានសេរី ចេញផ្សាយថ្ងៃ២៥ កុម្ភះនេះ។