សម្លេងម្ចាស់ឆ្នោត​កម្ពុជា

យោងតាមគេហទំព័រព័ត៌មាននៃវិទ្យុអាស៊ីសេរី ដែលបានចេញផ្សាយកាលពីថ្ងៃទី២០ មេសាបានឲ្យដឹងថាបេក្ខជនជាប់ឆ្នោតគណបក្សសង្គ្រោះជាតិ អ្នកស្រី មូរ សុខហួរ ត្រូវបានកម្លាំងសមត្ថកិច្ចចម្រុះច្រើនរយនាក់ ប្រដាប់ដោយខែលនិងដំបង រារាំងនិងចាប់សែងចេញជាថ្មីទៀត មិនឲ្យចូលទីលានប្រជាធិបតេយ្យ ជាទីតាំងមួយគត់ដែលរដ្ឋាភិបាលសាងសង់ឡើងដើម្បីទុកសម្រាប់ឲ្យ ពលរដ្ឋសម្ដែងមតិ ឬជួបជុំធ្វើកូដកម្មនិងបាតុកម្ម។ នេះជាលើកទី៥ហើយ ក្នុងការខិតខំទម្លុះទម្លាយចូលទៅកាន់បរិវេណទីលានប្រជាធិបតេយ្យនៅ រាជធានីភ្នំពេញ ដើម្បីសម្ដែងមតិនៅព្រឹកថ្ងៃអាទិត្យ ទី២០ មេសាម្សិលម៉ិញនេះ។

តាមគម្រោង អ្នកស្រី មូរ សុខហួរ និងក្រុមយុវជនជិត ៥០នាក់ ជាអ្នកគាំទ្រ ចង់ទៅសម្ដែងមតិនៅទីលានប្រជាធិបតេយ្យ គាំទ្រកម្មករឲ្យបន្តទាមទារសុំដំឡើងប្រាក់ខែគោល ១៦០ដុល្លារក្នុងមួយខែ។ តែគម្រោងនោះត្រូវបរាជ័យ ដោយកម្លាំងអាជ្ញាធរមានសមត្ថកិច្ចដាក់របាំងបិទច្រកចេញចូលទីលាន នោះ និងបានរុញអ្នកស្រីចេញ។

កាលពីថ្ងៃទី២៨ ខែមីនា អភិបាលរាជធានីភ្នំពេញ លោក ប៉ា សុជាតិវង្ស បានជូនដំណឹងទៅគណបក្សសង្គ្រោះជាតិ ហាមយកទីលានប្រជាធិបតេយ្យជាទីប្រជុំគ្នា ព្រោះអាជ្ញាធរកំពុងធ្វើការស៊ើបអង្កេត ដែលនាំឲ្យកើតមានអំពើហិង្សា និងការខាតបង់នានាក្នុងព្រឹត្តិការណ៍កន្លងមកមិនទាន់បានបញ្ចប់ជា ស្ថាពរ និងដើម្បីបញ្ចៀសនូវភាពចលាចលដែលអាចកើតមានពីជនឆ្លៀតឱកាស។

កម្លាំងសន្តិសុខឡោមព័ទ្ធតំណាងរាស្ត្រជាប់ឆ្នោតគណបក្ស សង្គ្រោះជាតិ អ្នកស្រី មូរ សុខហួរ មិនឲ្យចូលទីលានប្រជាធិបតេយ្យ កាលពីព្រឹកថ្ងៃ២០ មេសា ឆ្នាំ២០១៤។ CLEC Photo