សម្លេងម្ចាស់ឆ្នោត​កម្ពុជា

រដ្ឋសភាដែលមានសមាជិកមកពីគណបក្ស ប្រជាជនកម្ពុជា តែឯង បានបដិសេធចំពោះការស្នើសុំ ឲ្យផ្អាកអនុម័តសេចក្តីព្រាងច្បាប់ចំនួនបី ដែលទាក់ទងនឹងតុលាការ ដោយមន្ត្រីជាន់ខ្ពស់រដ្ឋសភាសំអាងថា ច្បាប់នេះធ្វើឡើងស្របតាមច្បាប់រដ្ឋធម្មនុញ្ញ ហើយបានឆ្លងកាត់ការពិគ្រោះយោបល់ពី អ្នកជំនាញរួចរាល់។ នេះបើតាមការចេញផ្សាយពីគេហទំព័រវីអូឌីដែលបានចេញផ្សាយនាព្រឹកថ្ងៃទី២១ មេសានេះ។

សេចក្តីថ្លែងការណ៍មជ្ឈមណ្ឌលសិទ្ធិមនុស្សកម្ពុជា (CCHR)  ចុះថ្ងៃទី២០ ខែមេសា បានហៅ សេចក្តីព្រាងច្បាប់នេះថា ធ្វើឡើងដោយមិនទាន់ឆ្លងកាត់មតិយោបល់ពីសាធារណៈជន និងមិនមានការគាំទ្រពីតំណាងរាស្ត្រទាំងអស់ដែលបានជាប់ឆ្នោត ខណៈគណបក្សសង្គ្រោះជាតិមិនចូលសភា ហើយសុំឲ្យរដ្ឋសភាពផ្អាកការអនុម័តច្បាប់គោលទាំងបីនេះជាបន្ទាន់។
ប៉ុន្តែ សមាជិកគណៈកម្មាធិការអចិន្ត្រៃយ៍នៃ រដ្ឋសភា លោក ជាម យៀប មានប្រសាសន៍ថា រដ្ឋសភាមិនអាចផ្អាកការអនុម័តច្បាប់នេះបានទេ ហើយយលោកប្រតិកម្មតបទៅមជ្ឈមណ្ឌលសិទ្ធិមនុស្សកម្ពុជា ថាមិនទាន់យល់ច្បាស់ពីច្បាប់រដ្ឋធម្មនុញ្ញ។

សេចក្តីព្រាងច្បាប់ចំនួន៣ ដែលគណៈរដ្ឋមន្ត្រី បានព្រាងនោះ រួមមានសេចក្តីព្រាងច្បាប់ស្តីពីការរៀបចំអង្គការតុលាការ សេចក្តីព្រាងច្បាប់ស្តីពីការរៀបចំ និងការប្រព្រឹត្តិទៅនៃឧត្តមក្រុមប្រឹក្សានៃអង្គចៅក្រម និងសេចក្តីព្រាងច្បាប់ស្តីពីលក្ខន្តិកៈនៃអង្គចៅក្រម និងព្រះរាជអាជ្ញា។

គេហទំព័រដដែលនេះក៏បានដកស្រង់សំដីរបស់ ប្រធានអង្គការក្រុមអ្នកច្បាប់ការពារសិទ្ធិកម្ពុជា(CDP) លោកមេធាវី សុក សំអឿន យល់ថា ប្រសិនបើសភាអនុម័តសេចក្តីព្រាងច្បាប់នេះ ដោយមិនមានឆ្លងកាត់យោបល់សាធារណជន ឬអង្គការសង្គមស៊ីវិលនោះ គឺមិនមែនជាប្រទេសប្រកាន់លទ្ធិប្រជាធិបតេយ្យទេ។