Cambodian Voter's Voice

គណបក្សសង្រ្គោះជាតិ៖ ការបង្ខាំងបេក្ខជនជាប់ឆ្នោត គឺជារឿង គេចវេសដោះស្រាយបញ្ហានយោបាយ

2014-06-09 14:56:00 4832 Views

ក្នុងសន្និសីទដែលរៀបចំដោយគណបក្សសង្រ្គោះជាតិ កាលពីព្រឹកមិញនេះ លោក កឹម សុខា អនុប្រធានគណបក្សសង្រ្គោះជាតិ បានចាត់ទុកព្រឹត្តការណ៍រារាំង និងបង្ខាំងបេក្ខជនជាប់ឆ្នោតគណបក្សសង្គ្រោះជាតិ ចូលទៅកាន់តំបន់អន្លង់វែង ខេត្តឧត្តរមានជ័យ ដើម្បីជួបអ្នកគាំទ្រដែលកើតមានកាលពីថ្ងៃទី ០៨ ខែមិថុនា ថា ការគេចវេសពីការដោះស្រាយបញ្ហានយោបាយ និង កំណែទម្រង់បោះឆ្នោត ដោយគេបានបង្វែងការចាប់អារម្មណ៍ទៅរកព្រឹត្តការណ៍នេះ។

លោក ប៉ុល ហំ អ្នកតំណាងរាស្ដ្រជាប់ឆ្នោតរបស់គណបក្សសង្រ្គោះជាតិ ខេត្តតាកែវ និង ត្រូវរងគ្រោះក្នុងព្រឹត្តការណ៍ពីម្សិលមិញ បានថ្លែងចោទប្រកាន់អំពើការរារាំងពីសំណាក់ជនស៊ីវិលនៅខេត្តឧត្តរមានជ័យ ថាជនស៊ីវិលដែលមករារាំង ជាអំពើរៀបចំជាប្រព័ន្ធ និងគ្រោងទុកជាមុន របស់កម្លាំងប្រដាប់អាវុធ គំរាមកំហែងផ្នែកនយោបាយ ។ លោកបន្ដថា ពួកកងកម្លាំងស៊ីវិលទាំងនោះបាន ដោះស្លាកលេខរថយន្ដ គំរាមដុតរថយន្ដ ព្រមទាំងដកហូតយក ipad និង ទូរស័ព្ទរបស់លោកនិង អ្នកតំណាងរាស្ដ្រផ្សេងទៀត ដែលនៅក្នុង ipad របស់លោកនោះមានផ្ទុកនូវព័ត៌មានផ្ទាល់ខ្លួន និងព័ត៌មានគណបក្ស។

គួររំលឹកផងដែរថា កាលពីថ្ងៃទី ៨ ខែមិថុនា ឆ្នាំ២០១៤ គណបក្សសង្រ្គោះជាតិ គ្រោងរៀបចំធ្វើកម្មវិធីសំណេះសំណាល នៅស្រុកអន្លង់វែង ខេត្ត ឧត្តរមានជ័យ តែត្រូវខកខានដោយសារមានការរំខាន និងរារាំងការរៀបចំពិធី។