Cambodian Voter's Voice

គណបក្សទាំងពីរ ជួបពិភាក្សាគ្នាតាមការគ្រោងទុក

2014-06-12 09:30:00 4802 Views

នៅវេលាប្រហែល០៩ព្រឹក ថ្ងៃទី ១២ ខែមិនុថា ឆ្នាំ២០១៤ ក្រុមការងារបច្ចេកទេសគណបក្សជាប់ឆ្នោតទាំងពីរ គណបក្សប្រជាជនកម្ពុជា និងគណបក្សសង្គ្រោះជាតិ ជួបពិភាក្សាគ្នានៅវិមានព្រឹទ្ធសភាដូចការគ្រោងទុក។ តាមប្រភពព័ត៌មានពីអ្នកសង្កេតខុមហ្វ្រែល នៅព្រឹទ្ធសភា បានឲ្យដឹងថា បេក្ខភាពពិភាក្សានៅថ្ងៃនេះមានចំនួន ៣នាក់ ក្នុងគណបក្សនីមួយៗ។ សមាសភាពក្រុមការងារបច្ចេកទេសគណបក្សសង្រ្គោះជាតិ ដឹកនាំដោយលោក គួយ ប៊ុនរឿន មានសមាជិក លោក យ៉ែម បុញ្ញរិទ្ធិ និងលោក អេង ឆៃអ៊ាង។ ចំណែកឯសមាភាពក្រុមការងារបច្ចេកទេសរបស់គណបក្សប្រជាជនកម្ពុជា ដឹកនាំ ដោយលោក ព្រុំ សុខា លោកសក់ សេដ្ឋា និងលោក កើត រិទ្ធ។

គួរបញ្ជាក់ផងដែរថា ជំនួបក្រុមការងារបច្ចេកទេសនាពេលនេះ ទំនងជាជជែកចរចារពីបញ្ហាកំណែទម្រង់ស្ថាប័ន គ.ជ.ប និងប្រព័ន្ធផ្សព្វផ្សាយ ក្រោយពេលលោកនាយករដ្ឋមន្ត្រី ហ៊ុន សែនបានប្រកាសជាសាធារណៈកាលពីថ្ងៃទី១០ ខែមិថុនា ថា គណបក្សប្រជាជនកម្ពុជា ព្រមដាក់បញ្ចូល ស្ថាប័ន គ.ជ.ប នៅក្នុងជំពូកថ្មីមួយទៀតនៃរដ្ឋធម្មនុញ្ញ និង ព្រមទាំងអនុញ្ញាតឲ្យមានការបង្កើតទូរស្សន៍ដែលគាំទ្រគណបក្សសង្គ្រោះជាតិ។