គ.ជ.ប ថាការដោះស្រាយបណ្ដឹងក្នុងពេលចុះឈ្មោះបោះឆ្នោត នឹងធ្វើឲ្យប្រជាពលរដ្ឋទៅបោះឆ្នោតកាន់តែច្រើន
2015-07-31 10:01:00 4806 Viewsសមាជិកគណៈកម្មាធិការជាតិរៀបចំការបោះឆ្នោត លោក ហ៊ីង ធីឬទ្ធិ លើកឡើងថា ការអនុវត្តការដោះស្រាយពាក្យបណ្តឹង ក្នុងដំណាក់កាលនៃការចុះឈ្មោះបោះឆ្នោត នឹងជំរុញឲ្យប្រជាពលរដ្ឋដែលមានសិទ្ធិ និងកាតព្វកិច្ចចូលរួមបោះឆ្នោតកាន់តែច្រើន។
លោក ហ៊ីង ធីឬទ្ធិ លើកឡើងបែបនេះ ក្នុងកិច្ចពិភាក្សាតុមូលនៅព្រឹកថ្ងៃព្រហស្បតិ៍នេះ ស្តីពីអនុសាសន៍ទាក់ទងនឹងបណ្តឹងក្នុងដំណាក់កាលចុះឈ្មោះបោះឆ្នោត។ លោក ហ៊ីង ធីឬទ្ធិ មានប្រសាសន៍ថា កន្លងមកប្រជាពលរដ្ឋមានការអាក់អន់ចិត្តច្រើនក្នុងការចុះឈ្មោះបោះឆ្នោត ដោយសារនីតិវិធីមានភាពសាំញ៉ាំ មានការបាត់ឈ្មោះ ការទទួលពាក្យបណ្តឹងមានភាពយឺតយ៉ាវជាដើម។ លោកថា គ.ជ.ប កំពុងកែសម្រួលនីតិវិធីពាក់ព័ន្ធនឹងការចុះឈ្មោះបោះឆ្នោតនេះ ដើម្បីផ្តល់ទំនុកចិត្តដល់ប្រជាពលរដ្ឋក្នុងការទៅបោះឆ្នោត។ លោកថា៖ "អាណា ដែលមានបញ្ហាពីមុន យើងរៀបចំឡើងវិញទាំងអស់ ដើម្បីឲ្យអាចទទួលយកបានទាំងអស់គ្នា។ អ៊ីចឹងសង្ឃឹមថា លើកនេះប្រហែលជាមានតម្លាភាព ហើយគាត់អស់ចិត្ត ហើយគាត់មិនពិបាករក គាត់មិនខ្វល់នឹងរឿងបាត់ឈ្មោះ គាត់មិនពិបាកនឹងដើររកការិយាល័យទៀតទេ"។
លោក ហ៊ីង ធីឬទ្ធិ បន្ថែមថា រាល់បណ្តឹងពាក់ព័ន្ធនឹងការចុះឈ្មោះបោះឆ្នោតត្រូវធ្វើជាដំណាក់កាល ប៉ុន្តែជាដំបូងត្រូវប្តឹងនៅកន្លែងចុះឈ្មោះបោះឆ្នោតផ្ទាល់។ លោកថា សម្រាប់ការចុះឈ្មោះបោះឆ្នោត ប្រជាពលរដ្ឋមិនចាំបាច់មានអត្តសញ្ញាណបណ្ណក៏បាន តែត្រូវធ្វើតាមនីតិវិធី។
នាយកប្រតិបត្តិអង្គការខុមហ្វ្រែល លោក គល់ បញ្ញា លើកឡើងថា គ.ជ.ប ត្រូវបង្កើតគណៈកម្មការទទួល និងអង្កេតពាក្យបណ្តឹង ព្រមទាំងសម្រួលដល់ដំណើរការនៃការដាក់ពាក្យបណ្តឹងរបស់ប្រជាពលរដ្ឋ គ្រប់ករណីណាមួយដែលពួកគាត់មិនសុខចិត្ត។ លោកថា៖ "ត្រូវតែមន្ត្រី ម្នាក់ដែល គ.ជ.ប នៅក្បែរហ្នឹងជួយបំពេញបណ្ដឹងឲ្យប្រជាពលរដ្ឋភ្លាម ដើម្បីឲ្យប្រជាពលរដ្ឋដាក់បណ្ដឹង ព្រោះតែមានរារាំង មានបញ្ហា ធ្វើឧបសគ្គដល់គាត់ក្នុងការចុះឈ្មោះ គាត់មានសិទ្ធិប្តឹង។ អ៊ីចឹងការទទួលពាក្យបណ្ដឹងត្រូវឲ្យស្រួល អត់មានពេលគាត់សរសេរ ដេញគាត់ ខុសបន្តិច អត់ទទួលពាក្យបណ្តឹង ត្រូវតែទទួល ហើយចាំមកស៊ើបអង្កេត ផ្ទៀតផ្ទាត់ក្រោយ"។
នៅក្នុងកិច្ចពិភាក្សាតុមូលនាព្រឹកនេះ សម្ព័ន្ធកំណែទម្រង់ការបោះឆ្នោត(ERA) បានផ្តល់អនុសាសន៍របស់ខ្លួន១០ចំណុចឲ្យទៅ គ.ជ.ប ដើម្បីកែប្រែ និងដាក់បញ្ចូលក្នុងបទបញ្ជា នីតិវិធី និងការត្រៀមរៀបចំក្នុងដំណាក់កាលចុះឈ្មោះបោះឆ្នោត។ ឆ្លើយតបនឹងការផ្តល់អនុសាសន៍នោះសមាជិក គ.ជ.ប លោក ហ៊ីង ធីឬទ្ធិ មានប្រសាសន៍ថានឹងយកទៅប្រជុំធំជាមួយសមាជិកទាំង៩រូប រួមនឹងម្ចាស់ជំនួយដែលមានជប៉ុន និងសហភាពអឺរ៉ុបក្នុងការសម្រេចថានឹងទទួលយក ឬយ៉ាងណា៕ ប្រភពVOD
ផែនទីលទ្ធផលបោះឆ្នោត
ភាពមិនប្រក្រតីនៃការបោះឆ្នោតឆ្នាំ២០១៣
ស្តាប់ការផ្សាយវិទ្យុសម្លេងសង្គមស៊ីវិល តាមប្រព័ន្ធអ៊ិនធើណែត
7:30AM-8:30AMAsk the Candidate
COMFREL FACEBOOK PAGE
ប្រភពព័ត៌មានបោះឆ្នោតផ្សេងៗ
| Power by: |
|