សម្លេងម្ចាស់ឆ្នោត​កម្ពុជា

លោក ខៀវ សុភ័គ អ្នកនាំពាក្យក្រសួងមហាផ្ទៃ អះអាងថាសមត្ថកិច្ចនឹងចាប់ខ្លួនប្រធានគណបក្សសង្រ្គោះជាតិ លោក សម រង្ស៊ី ពេលលោកមកដល់ប្រទេសកម្ពុជានៅយប់ថ្ងៃចន្ទនេះ។លោក សម រង្ស៊ី ត្រូវបានតុលាការចេញដីកាបង្គាប់ឲ្យសមត្ថកិច្ចចាប់ខ្លួនដាក់ពន្ធនាគារ២ឆ្នាំ ពីបទបរិហាកេរ្តិ៍ជាសាធារណៈនិងញុះញង់ឲ្យមានការរើសអើង ដែលប្តឹងដោយ លោក ហោ ណាំហុង រដ្ឋមន្រ្តីក្រសួងការបរទេសកម្ពុជា បន្ទាប់ពីលោក សម រង្ស៊ី ថ្លែងនៅសារមន្ទីរជើងឯកកាលពីឆ្នាំ២០០៨ថាលោក ហោ ណាំហុង ជាអតីតមេគុកបឹងត្របែកសម័យខ្មែរក្រហម។ គណបក្សសង្រ្គោះជាតិចាត់ទុកថានេះជាដីកានយោបាយ។លោក ខៀវ សុភ័គ បានឪ្យដឹងនៅព្រឹកថ្ងៃចន្ទនេះថាការចាប់ខ្លួននេះធ្វើឡើងតាមដីការបស់តុលាការ។ លោកបន្តថាលោកមិនទាន់ដឹងថាត្រូវចាប់ខ្លួននោះនឹងធ្វើឡើងនៅអាកាសដ្ឋានអន្តរជាតិភ្នំពេញឬយ៉ាងណានោះទេ។ លោកបញ្ជាក់ថា៖ “សមត្ថកិច្ចរបស់យើងវាមានតែអនុវត្តតាមដីកា។ ប៉ុន្តែការចាប់ខ្លួនក៏មិនទាន់ដឹងថានឹងត្រូវចាប់នៅព្រលានឬនៅទីណាទេ? ចាប់កន្លែងណាឲ្យហើយ ស្រេចតែគេ អាហ្នឹងគេចេះច្បាប់ ចាប់ត្រង់ណាក៏ដោយ ក៏ប៉ូលិសនៅស្រុកខ្មែរដែរ”។