Cambodian Voter's Voice

រដ្ឋាភិបាលបង្កើនកម្ចីបរទេសចាប់ពីឆ្នាំ២០១៦ ដោយខ្ចីចន្លោះពី៩០០ទៅ១១០០លានដុល្លារក្នុងមួយឆ្នាំ

2015-11-20 15:03:00 4730 Views

រដ្ឋាភិបាលគ្រោង នឹងខ្ចីលុយបរទេសចន្លោះពី៩០០ទៅជាង១១០០លានដុល្លារ ក្នុងមួយឆ្នាំ ចាប់ពីឆ្នាំ២០១៦ដល់២០១៨ អាស្រ័យទៅតាមស្ថានភាពនៃសេដ្ឋកិច្ចរបស់កម្ពុជា ដែលចំនួននេះមានការកើនឡើងលើសពីផែនការដែលបានគ្រោងទុកកាលពីមុន។ នេះបើយោងតាមឯកសារយុទ្ធសាស្រ្តស្តីពីការគ្រប់គ្រងបំណុលសាធារណៈឆ្នាំ ២០១៥-២០១៨ រៀបចំដោយក្រសួងសេដ្ឋកិច្ចនិងហិរញ្ញវត្ថុ ដែលវីអូឌី(VOD)ទទួលបាននៅថ្ងៃសុក្រនេះ។ឯកសារយុទ្ធសាស្រ្តរបស់រដ្ឋាភិបាលបាន បញ្ជាក់ថាក្នុងឆ្នាំ២០១៥ ទំហំនៃការខ្ចីថ្មីបន្ថែមក្នុងរង្វង់ជាង៨២៨លានដុល្លារហើយ សម្រាប់ឆ្នាំ២០១៦ដល់២០១៨ រង្វង់នៃការខ្ចីមានចំនួនចន្លោះពី៩៩៧លានដុល្លារទៅប្រមាណ១១០៥ លានដុល្លារក្នុងមួយឆ្នាំ អាស្រ័យទៅតាម”បរិការណ៍នៃគោលនយោបាយថវិកានិងវិវឌ្ឍនាការម៉ាក្រូសេដ្ឋកិច្ចជាក់ស្តែងរបស់កម្ពុជា”។ ឯកសារបន្តថា៖ “រាជ រដ្ឋាភិបាលនឹងប្រើប្រាស់ឥណទានសម្បទានសម្រាប់វិស័យ ហេដ្ឋារចនាសម្ព័ន្ធរូបវន្តដែលមានប្រសិទ្ធភាពសេដ្ឋកិច្ចខ្ពស់និងវិស័យ បង្កើនផលិតភាពផលិតកម្ម សំដៅទ្រទ្រង់ចីរភាពកំណើនរយៈពេលវែង ដូចជាផ្លូវ ថ្នល់ស្ពាន ប្រព័ន្ធស្រោចស្រព អគ្គិសនី កំពង់ផែ ការផ្គត់ផ្គង់ទឹកស្អាតនៅទីប្រជុំជន ស្ថានីយ៍សម្អាតទឹក កខ្វក់ និងការបណ្តុះបណ្តាលវិជ្ជាជីវៈសម្រាប់ ជំរុញការអភិវឌ្ឍវិស័យឧស្សាហកម្មជាដើម”។