Cambodian Voter's Voice

លោក កឹម សុខា ៖ នៅតែបន្តរកដំណោះស្រាយឲ្យកម្មកររងគ្រោះផ្លូវវ៉េងស្រេង

2016-01-04 09:40:00 4723 Views

មេដឹកនាំគណបក្សសង្គ្រោះជាតិអះអាងថា គណបក្សប្រឆាំងធំជាងគេមួយនេះ “នៅតែបន្តរកដំណោះស្រាយជូនកម្មករ-កម្មការនីទាំងអស់ក្នុងការទាមទារលើកកម្ពស់” ប្រាក់ឈ្នួល និងលក្ខខណ្ឌការងារសមរម្យ។នៅលើហ្វេសប៊ុករបស់ លោក កឹម សុខា កាលពីថ្ងៃទី៣ ខែមករា ចំថ្ងៃខួប២ឆ្នាំនៃព្រឹត្តិការណ៍បាញ់បង្ក្រាបនៅផ្លូវវ៉េងស្រេង ប្រធានស្តីទីគណបក្សសង្គ្រោះជាតិ បានសរសេរថា លោក “សូមចូលរួមរំលែកមរណទុក្ខ ជាមួយប្រជាពលរដ្ឋ និងក្រុមគ្រួសារ ដែលជាជនរងគ្រោះនៃការបាញ់ប្រហារមកលើកម្មករ-កម្មការនី កាលពី ២ ឆ្នាំកន្លងទៅនេះ”។ លោក កឹម សុខា បានអះអាងទៀតថា “ការតស៊ូ លះបង់ របស់កម្មករទាំងនោះនឹងត្រូវបានកត់ត្រាជាប្រវត្តិសាស្ត្រ ដែលគេមិនអាចបំភ្លេចបាន” ។ លោកបានអំពាវនាវដល់ថ្នាក់ដឹកនាំទាំងអស់ជៀសវាងឲ្យបានជាដាច់ខាតនាពេល អនាគត ក្នុងការប្រើអំពើហិង្សាមកលើពលរដ្ឋរបស់ខ្លួន។