សម្លេងម្ចាស់ឆ្នោត​កម្ពុជា

ប្រធានគណបក្សហ្វ៊ុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ ប្រកាសថា ព្រះអង្គគ្មានបំណងឲ្យមន្ត្រីណាម្នាក់ក្នុងបក្សទៅលូកដៃក្នុងក្រុមការងារបោះឆ្នោតនៅតាមខេត្តនោះទេ ខណៈអនុប្រធានទី២របស់គណបក្សនេះគឺលោក ញឹក ប៊ុនឆៃ អះអាងថា លោកគ្មានបំណងលូកដៃក្នុងកិច្ចការនេះទេ។នៅក្នុងសេចក្ដីជូនដំណឹង ចុះថ្ងៃទី២៥ ខែមករា សម្ដេចក្រុមព្រះបានព្រះបន្ទូលព្រមានថា ព្រះអង្គគ្មានបំណងដេញសមាជិកណាចេញពីគណបក្សនោះទេ តែចំពោះសមាជិកណាដែលបំបះបំបោរអូសទាញបំបែកកម្លាំងរាជានិយម ព្រះអង្គគ្មានជម្រើសក្រៅពីអញ្ជើញឲ្យចេញពីបក្សនោះឡើយ។សម្ដេចក្រុមព្រះបន្តទៀតថា ព្រះអង្គក៏គ្មានបំណងឲ្យមន្ត្រីជាន់ខ្ពស់ណាក្នុងបក្សទៅលូកដៃក្នុងក្រុមការងារបោះឆ្នោតនៅតាមខេត្តផ្សេងៗនោះទេ។ ព្រះអង្គបានអំពាវនាវឲ្យប្រធានក្រុមការងារខេត្តនីមួយៗបន្តខិតខំប្រឹងប្រែងយកចិត្តទុកដាក់ក្នុងការពង្រឹងពង្រីករចនាសម្ព័ន្ធតាមមូលដ្ឋានរាជធានីខេត្ត។