សម្លេងម្ចាស់ឆ្នោត​កម្ពុជា

លោក ស ខេង រដ្ឋមន្ត្រី​ក្រសួងមហាផ្ទៃ​បាន​ជំរុញ និង​ណែនាំ​មន្ត្រីក្រោមឱវាទ​ពាក់ព័ន្ធ​ទាំងអស់ ពី​នីតិវិធី​បច្ចេកទេស​ការ​ធ្វើ​អត្តសញ្ញាណប័ណ្ណ​ថ្មី​ដល់​អាជ្ញាធរ​ មូលដ្ឋាន ដើម្បី​ពួកគេ​អនុវត្ត​ន៍ការងារ​ផ្តល់​អត្តសញ្ញាណ​ប័ណ្ណ​ថ្មី ជាង ១០​លាន​បណ្ណ ប្រកបដោយ​ប្រសិទ្ធភាព​រួចរាល់ មុន​ការបោះឆ្នោត ដើមឆ្នាំ ២០១៧ ខាងមុខ​។​លោក បាន​និយាយ​តប​នឹង​សំណួរ​អ្នកសារព័ត៌មាន បន្ទាប់ពី​លោក​បើក​សន្និបាត បូកសរុប​ការងារ​ឆ្នាំ​២០១៥ និង​លើក​ទិសដៅ​ការងារ​ឆ្នាំ​២០១៦ ក្រសួងមហាផ្ទៃ កាល​ថ្ងៃទី​២៣ ខែកុម្ភៈ នេះ​ថា លោកបាន​ជំរុញ​មន្ត្រី​អគ្គនាយក​នៃ​អគ្គនាយកដ្ឋាន​អត្តសញ្ញាណ​កម្ម អភិបាល​នៃ​គណៈ​អភិបាល​រាជធានី​-​ខេត្ត ស្នងការ​នគរបាល​រាជធានី​ខេត្ត អភិបាល​រាជធានី ខេត្ត និង​មន្ត្រី​ទទួលបន្ទុក​ការរៀបចំ​សំណុំបែបបទ​ផ្តល់​អត្តសញ្ញាណប័ណ្ណ​សញ្ជាតិ​ខ្មែរ​ត្រូវ​ចាត់ចែង​អនុវត្ត​ន៍ឲ្យ​មាន​ប្រសិទ្ធភាព​ខ្ពស់​។​