Cambodian Voter's Voice

ក្រុមសមត្ថកិច្ចចុះបញ្ឈប់សិក្ខាសាលារបស់អង្គការសិទ្ធិមនុស្សអាដហុក

2016-03-18 10:00:00 4792 Views

សិក្ខាសាលាចំនួន ២ របស់អង្គការសិទ្ធិមនុស្ស អាដហុក ក្រោមកិច្ចឧបត្ថម្ភរបស់អង្គការ USAID ដែលធ្វើឡើងព្រមគ្នាកាលពីម្សិលមិញ នៅខេត្តព្រះវិហារ និងខេត្តរតនគិរី ត្រូវបានក្រុមសមត្ថកិច្ចចុះទៅបញ្ឈប់នៅនឹងកន្លែង ដែល អាដហុក ចាត់ទុកទង្វើនេះជាការចង់ផ្ចាញ់ផ្ញាលជំរុញដោយនយោបាយ។ទោះជាយ៉ាងនេះក្តី ក្រុមអាជ្ញាធរឃុំ ស្រុក និងខេត្ត កាលពីម្សិលមិញបានធ្វើការប្រកែកថា ខ្លួនបានបញ្ជូនក្រុមសមត្ថកិច្ចទៅបញ្ឈប់សិក្ខាសាលានេះ ដោយសារតែអង្គការអាដហុកមិនបានធ្វើលិខិតស្នាមសុំការអនុញ្ញាតពី ច្បាប់ឲ្យបានត្រឹមត្រូវ។សិក្ខាសាលានេះមានឈ្មោះថា «កម្មវិធីផ្តល់សិទ្ធិអំណាចទៅដល់សហគមន៍តូចៗ» ត្រូវបានរៀបចំឡើងដោយអង្គការ អាដហុក ជាមួយនឹងថវិកាប្រមាណ ១.១ លានដុល្លារដែលត្រូវបានឧបត្ថម្ភដោយអង្គការ USAIDS របស់សហរដ្ឋអាមេរិក។ លោក ឆាយ ធី ជាមន្ត្រីសម្របសម្រួលរបស់អង្គការអាដហុកប្រចាំខេត្តរតនគិរីបានអះអាង ថា លោកបានផ្ញើលិខិតមួយសន្លឹកទៅក្រុមអាជ្ញាធរខេត្ត ដើម្បីជូនដំណឺងទៅដល់ពួកគេពីសកម្មភាពនានារបស់អង្គការអាដហុករួច ទៅហើយកាលពីខែមករា ហើយលោកបានលើកឡើងថា ការចុះបញ្ឈប់នេះគឺជា«រឿងនយោបាយ»។ ប្រភពភ្នំពេញប៉ុស្ដិ៍