Cambodian Voter's Voice

លោក សម រង្ស៊ី ត្រូវតុលាការចោទ ១ ករណីទៀតខណៈមេបក្សរូបនេះកំពុងជាប់បណ្តឹង ៣ នៅតុលាការ

2016-03-31 14:40:00 4774 Views

សាលាដំបូងរាជធានីភ្នំពេញបានសម្រេចធ្វើការចោទប្រកាន់ប្រឆាំង លោក សម រង្ស៊ី នូវបណ្តឹងថ្មីមួយទៀតពីបទបរិហារកេរ្តិ៍លោក ហេង សំរិន ប្រធានរដ្ឋសភាទាក់ទងនឹងសារដែលបានបង្ហោះនៅលើហ្វេសប៊ុកកាលពីថ្ងៃ ទី ១៧ ខែវិច្ឆិកា ឆ្នាំ ២០១៥ ធ្វើឲ្យមេបក្សប្រឆាំងដែលមានទោសជាប់ពន្ធនាគារ ២ ឆ្នាំរួចទៅហើយនោះប្រឈមទៅនឹងបណ្តឹងចំនួន ៣ នៅតុលាការដែលនេះគឺសុទ្ធតែជាសំណុំរឿងដែលអ្នកវិភាគចាត់ទុកថា គឺជារឿងនយោបាយ។លោក គី តិច មេធាវីលោក ហេង សំរិន បានបញ្ជាក់កាលពីម្សិលមិញថាតំណាងអយ្យការសាលាដំបូងរាជធានីភ្នំពេញ លោក វង្ស ប៊ុនវិសុទ្ធ បានសម្រេចចោទប្រកាន់កាលពីប៉ុន្មានថ្ងៃកន្លងទៅហើយសំណុំរឿងនេះ នឹងត្រូវបើកជំនុំជម្រះដោយលោកចៅក្រម រស់ ពិសិដ្ឋ។ ក៏ប៉ុន្តែលោកចៅក្រម រស់ ពិសិដ្ឋ បានថ្លែងថា លោកមិនទាន់ទទួលបានការចាត់តាំងលើសំណុំរឿងនេះជាផ្លូវការនៅឡើយ ទេ។ បើតាមលោកមេធាវី គី តិច សំណុំរឿងនេះអាចនឹងត្រូវលើកយកមកជំនុំជម្រះនៅខែមិថុនាឆ្នាំ ២០១៦ ខាងមុខនេះ។ ប្រភពភ្នំពេញប៉ុស្ដិ៍