Cambodian Voter's Voice

ជប៉ុន បារាំង និងអាមេរិក ចង់ឃើញបក្សទាំងពីរសន្ទនាគ្នាឡើងវិញ

2016-07-07 08:15:00 4722 Views

ដៃគូអភិវឌ្ឍ របស់កម្ពុជាមួយចំនួននៅតែសំដែងការព្រួយបារម្ភចំពោះស្ថានការណ៍នយោបាយ កម្ពុជាបច្ចុប្បន្ន។ ពួកគេសង្ឃឹមថាគណបក្សកាន់អំណាច និងគណបក្សប្រឆាំងវិលមកសន្ទនាគ្នាឡើងវិញ។
«ខ្ញុំសង្ឃឹមថា គណបក្សទាំងពីរនឹងកសាងទំនុកចិត្ត និងការជឿជាក់គ្នាឡើងវិញ»។ នេះគឺជាការអធិប្បាយរបស់ឯកអគ្គរាជទូតជប៉ុនលោក គូម៉ាម៉ារុ យូជិ (Kumamaru Yuji) ប្រាប់អ្នកកាសែតនៃសារព័ត៌មានថ្មីៗកាលពីថ្ងៃទី៤ខែកក្កដានៅក្នុង ស្ថានទូតជប៉ុន ក្នុងពិធីផ្តល់ជំនួយដល់គណៈកម្មាធិការជាតិរៀបចំការបោះឆ្នោត។
ការអធិប្បាយវែងជាងនេះ មានមកពីស្ថានទូតបារាំងនៅពេលដែលសារព័ត៌មានថ្មីៗសួរអំពី ចំណាប់អារម្មណ៍របស់ពួកគេលើបរិយាកាសនយោបាយរបស់កម្ពុជាបច្ចុប្បន្ន។ លេខាទី១ និងជាអ្នកនាំពាក្យរបស់ស្ថានទូតបារាំងលោក នីកូឡា បូឌ្វាំង (Nicolas Baudouin) បានឆ្លើយតាមសារអេឡិចត្រូនិកថា ប្រទេសបារាំងដែលកំពុងធ្វើការជាមួយរដ្ឋាភិបាល និងសង្គមស៊ីវិលរបស់កម្ពុជាបានសំដែងការព្រួយបារម្ភរួចហើយជាមួយ ប្រទេសនៃសហភាពអឺរ៉ុបដទៃទៀតអំពីការវិវត្តផ្នែកនយោបាយនៅកម្ពុជា។ បើតាមមន្ត្រីជាន់ខ្ពស់នៃស្ថានទូតបារាំងរូបនេះ ស្ថានទូតបារាំងក៏បានអំពាវនាវដល់អ្នកនយោបាយពាក់ព័ន្ធទាំងអស់ត្រឡប់ មករកតុចរចាឡើងវិញ ដើម្បីប្រយោជន៍នៃការបោះឆ្នោតសំខាន់ទាំងពីររបស់កម្ពុជានៅពេលខាងមុខ ដែរ។ប្រភពថ្មីៗ

http://thmeythmey.com/?page=detail&ctype=article&id=41820&lg=kh