Cambodian Voter's Voice

គណបក្សយុវជនកម្ពុជាព្រមានបាតុកម្មបើវៀតណាមមិនឆ្លើយតបញត្តិខ្លួនរឿងបញ្ហាព្រំដែន

2016-08-30 10:50:00 4757 Views

សមាជិកគណបក្សយុវជនកម្ពុជា ១៥នាក់ យកញត្តិទៅដាក់នៅស្ថានទូតវៀតណាម កាលពីព្រឹកថ្ងៃច័ន្ទ ទី២៩ ខែសីហា ទាមទារអោយភាគីវៀតណាម បញ្ឈប់ការរំលោភទឹកដីកម្ពុជា។ គណបក្សនេះថា ខ្លួននឹងរៀបចំធ្វើបាតុកម្មបិទទីផ្សារផលិតផលវៀតណាម នៅកម្ពុជា ប្រសិនបើគ្មានការឆ្លើយតប។ អ្នកនាំពាក្យរដ្ឋាភិបាលថា ការទាមទារអោយបិទទីផ្សារនេះជាគំនិតព្រៃ។គម្រោងធ្វើបាតុកម្មទាមទារអោយបិទទីផ្សារផលិតផលវៀតណាម នៅកម្ពុជានេះ ជាផ្នែកមួយនៃញត្តិទាមទាររបស់គណបក្សយុវជនកម្ពុជា ដាក់ទៅកាន់រដ្ឋាភិបាលវៀតណាម ដែលស្នើអោយបញ្ឈប់នូវអំពើដែលគណបក្សនោះហៅថា ទុច្ចរិត និងរំលោភលើទឹកដីកម្ពុជា ដូចជាការសាងសង់ប៉ុស្តិ៍ និងជីកស្រះលើតំបន់ហាមឃាត់ ឬហៅថា តំបន់ស និងការប្រើអំពើហិង្សាលើប្រជាជនខ្មែររស់នៅតាមព្រំដែន។ប្រធានគណបក្សយុវជនកម្ពុជា លោក ពេជ្រ ស្រស់ និងសមាជិកបក្ស ១៤នាក់ទៀត បាននាំយកញត្តិទាមទារនេះទៅដាក់នៅស្ថានទូតវៀតណាម នៅព្រឹកថ្ងៃច័ន្ទ ទី២៩ ខែសីហា ឆ្នាំ២០១៦។ លោក ពេជ្រ ស្រស់ បានអោយអាស៊ីសេរី ដឹងថា ខាងស្ថានទូតមិនបានទទួលយកសេចក្ដីទាមទាររបស់ គណបក្សលោកទេ ដោយលើកមូលហេតុថា រវល់ប្រជុំ។ អភិបាលរងខណ្ឌចំការមន ជាអ្នកមកទទួលជំនួស ហើយប្រាប់ថា នឹងប្រគល់ជូនស្ថានទូតវៀតណាម។ប្រភពRFA

http://www.rfa.org/khmer/news/politics/youth-party-warn-to-demon-against-VN-in-08292016002650.html