Cambodian Voter's Voice

ព្រឹទ្ធសភា សម្រេចដក អភ័យឯកសិទ្ធិព្រឹទ្ធសភា របស់លោកស្រី ថាក់ ឡានី

2016-09-01 10:15:00 4805 Views

កិច្ចប្រជុំនេះ ដឹកនាំដោយ សម្តេច សាយ ឈុំ ប្រធានព្រឹទ្ធសភា។ យ៉ាងណាក៏ដោយ សមាជិកព្រឹទ្ធសភា ១១រូបមកពីគណបក្ស សម រង្ស៊ី បានធ្វើពហិការ។តាមអ្នកនាំពាក្យព្រឹទ្ធសភា លោក ម៉ម បុននាង បានប្រាប់សារព័ត៌មានថា សមាជិកព្រឹទ្ធសភា ៤៦រូបបានសម្រេច ដកអភ័យឯកសិទ្ធិសភា របស់លោកស្រី ថាក់ ឡានី ជាផ្លូវការ។សេចក្តីជូនដំណឹងរបស់ព្រឹទ្ធសភា បានឱ្យដឹងថា បន្ទាប់ពីបានពិនិត្យ និងពិភាក្សារួច មក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃព្រហស្បតិ៍ ទី០១ខែកញ្ញា ឆ្នាំ២០១៦ វេលាម៉ោង០៨:០០នាទីព្រឹក ដើម្បីបន្តសម័យប្រជុំលើកទី៩ព្រឹទ្ធសភា នីតិកាលទី៣ ដែលមានរបៀបវារៈគឺដើម្បី ពិនិត្យ និងសម្រេចលើសេចក្តីស្នើសុំ លើកអភ័យឯកសិទ្ធិសភា របស់លោកស្រី ថាក់ ឡានី សមាជិកាព្រឹទ្ធសភា មណ្ឌលភូមិភាគទី២។សូមជម្រាបថា ការប្រជុំលើកអភ័យឯកសិទ្ធិសភា របស់លោកស្រី ថាក់ ឡានី ធ្វើឡើងតាមតាមសំណើរបស់ អគ្គព្រះរាជអាជ្ញាអមសាលាឧទ្ធរណ៍ កាលពីថ្ងៃទី២៦ខែសីហា ឆ្នាំ២០១៦ ដើម្បីឱ្យតុលាការអាចបន្តនីតិវិធីរបស់ខ្លួន ក្រោយពីលោកស្រីបានបដិសេធមិនចូលខ្លួន តាមការកោះហៅរបស់តុលាការ ដោយសំអាងលើអភ័យឯកសិទ្ធិ។ប្រភពវិទ្យុស្រ្តីFM102

http://wmc.org.kh/archives/25377